Covid-19 vei mi 13 hmuh belh

July 20, Thawhṭannia Zoram Medical College (ZMC) laboratory-a mi 133-te swab sample endikah Covid-19 hripui vei mi 13 hmuh chhuah a ni a; chutih laiin, hripui vei endik nawnnaah mi pathumin an vei tawh lo tih finfiah a ni thung.

Sorkar lam aṭanga thuchhuah hrang hrang aṭanga hriat theih chinah, Mizoramah Covid-19 vei hmuh chhuah tawh zawng zawng chu mi 297 an ni a, chu'ng zinga mi 180 (60.61%) chuan an vei tawh lo (negative tawh) a, vei mek mi 117 (39.39%) an awm. Hripui vei tawh lo 180 zinga 168 (vei tawh zat aṭangin 56.57%) chu chhuahtir an ni tawh.

Thawhṭannia ZMC laboratory-a mipa 108 leh hmeichhia 25-te dinhmun endiknaah hian mi 120-te sample a negative laiin, positive (Covid-19 vei) mi 13 hmuh chhuah belh a ni. Endikte chu - State Referral Hospital (SRH)-a awm lai mi 14 bakah, Aizawl district mi 111 leh Hnahthial district mi pariatte an ni. Sorkar thuchhuah tarlan danin, Covid-19 vei hmuh thar mi 13-te hi mipa vek, kum 23-49 inkar, Aizawl district-a mi vek an ni a; mi 11 chu BSF mi leh sate niin, BSF-in quarantine centre atana an hman RAY building, Falkland Venga khung hran mek, harsatna nei lo (symptom lang lo) vek an ni.

Mi dang pahnihte zinga pakhat chu sipai, tun hnaia Jammu & Kashmir aṭanga rawn haw, symptom nei a ni. Pakhat zawk chu Mizoram chhunga Covid-19 vei aṭanga kái chhâwng (positive contact) a ni a, symptom a lang lo. Mi pahnihte hi SRH-a awm ve ve an nia tarlan a ni a, positive contact aṭanga kái zawk erawh chu July 20, Thawhṭanni zan khan Leitan (Durtlang) vengah futsal a khèl nia thu dawn a ni thung. July 20 vêk khan Lunglei Civil Hospital (LCH) laboratory-a sample 17 endik zingah BSF sipai Covid-19 vei palite an tel a, mi pathum chuan an vei tawh lo (negative) tih finfiah a ni a, pakhat erawh chuan a la vei thung. LCH-a endikte endik nawnna vek an ni.