CAG report kan uluk; a rintlak - CAG, Mizoram

Comptroller and Auditor General of India (CAG), Mizorama accountant general (AG) HK Dharmadarshi chuan, CAG report chu a rintlak thu sawiin, "Ṭum eng emaw zat endik a nih hnu leh department-in an pawm thlapte report-ah kan tarlang ṭhin," a ti.

Vanglaini palai zawhna chhangin HK Dharmadarshi chuan, CAG-in report an siam dawnin sorkar department aṭangin document an dil chhuah ṭhin thu a sawi a, "Kan audit-te concern department aṭanga document kan lak mai bakah, field visit neih a ṭul pawhin department officer-te nen kal thlap a, hriat duh kan neihte chu officer-te kan zâwt ṭhin," a ti a; an report-ah chuan finfiahna awm thei lo tarlan a rem loh thu a sawi.

CAG AG chuan, sorkar hotute'n an report-ah dik lo a awm nia an sawi chu chháng tur an nih loh thu sawiin, "Sorkar hotute thusawi hi hnial tur kan ni lo a, a dik leh dik lo pawh sawi tur kan ni lo. Keini erawh chuan kan kalphung erawh kan sawi thei," a ti.

HK Dharmadarshi sawi danin, CAG-in audit an neih dawnin, audit-tu tur (auditor) an inruat a; auditor chu a enfiah tur department-ah kalin, document a mamawhte a dil khawm a, hriatthiam loh an neihte leh thil dik lo nia a hmuh chhuahte chu department hotute an zawtfiah ṭhin. Hmun tlawh ngai a awm a nih chuan department hotute nen an tlawh a, an enho ṭhin a ni.

Report peih a nih hnuah Report Section-ah an thawn a, Report Section chuan uluk taka zir chiangin, thil dik lo a awm leh awm loh an enfiah ve leh ṭhin. Chumi hnuah Deputy Accountant General hnenah thawn leh a ni a, Dy.AG-in a enfel hnuah AG-in a lo endik ve leh ṭhin a ni. AG-in a endik hnuah a kaihhnawih department hotute nen an sawiho a, report an siamah dik tawk lo a awm leh awm loh an enfiah ṭhin bawk.

Department-te nen report enfiah a nih hnuah CAG, Mizoram chuan CAG hmunpui New Delhi-ah report chu an thawn a, New Delhi lamin ṭhuang thumin an lo endik ve leh a, hriat fiah duh leh dik tâwk lo awma an hriatte chu an lo zawtfiah ve leh ṭhin. Chumi hnuah chuan draft report chu department lamah an lo endik turin thawn leh phawt a ni.

Department lam hian an zirchian hnu hian CAG chuan a kaihhnawih department secretary leh hotute meeting an neihpui leh a, chuta sawisel an neih tawh loh chin, department hotute'n an pawm thlap chu CAG report-ah an tarlang ṭhin.

CAG hotute chuan, report-a an tarlan chinte chu department lam pawhin an pawm thlap a nih thu sawiin, "Department lamin an sawi fel theih tawh loh chinte report-ah hian kan tarlang ṭhin," an ti.

NLUP an zir chian chhan sawiin CAG hotute chuan, "Kum ruk chhung kalpui tawh a ni chungin engmah zirchianna a awm loh avangin NLUP hi endik atan kan thlang a ni," a ti a; an audit turte pawh uluk taka an thlan ṭhin thu an sawi.