Indigenous hrilhfiah chiam dan a awm lo - Law & Judicial department

Law & Judicial de­part­ment hotute chuan, 'indigenous' tih chu hrilhfiah leh chuan dan vak a awm loh thu an sawi a, "UNO pawhin a hrana hrilhfiahna a nei lo," an ti.

Vanglaini palai zawhna chhanga Law & Judicial department hotute sawi danin, khawvelah indigenous tih hrilhfiahna hranpa siam a ni lo.

Dictionary ṭhenkhatah chuan indi­genous tih chu 'native' tih a ni a, native tih chu chi hnih - 'ram luah lut hmasatute' tih leh, 'a ram mi ni tura ID pawimawh neite' tia ṭhen hran a ni.

Law & Judicial hotute chuan, MZP-te duh dan anga 'indigenous' chu hrilhfiah ngawt theih a ni lo tih sawiin, "Khawvel pawhin hrilhfiahna hran­pa a neih loh laia duh dan anga kan lo hrilhfiah ve ngawt a nih chuan a dikin a rinawm loh. Tuna kan hrilhfiah chinah pawh native tih a ni deuh tawp mai. 'Zo' tih telh ngawt chu a rem lo ang," an ti.

The Mizoram (Selec­tion of Candidates for Higher Technical Course Fifth Amendment) Rules-a category-I ah Chakma-te dah an nih avangin MZP chuan kum 2014 khan lungawi lohna an lantir a, hei vang hian Mizoram sorkar chuan Rules chu siam ṭhain 'indegenous' tih aiah 'Zo-ethinic' tia thlak a ni a; mahse, Rules siamṭhat hi Court chuan hman a phal lo.

Indigenous tih chung­changah ngaihdan inang lo a awm avangin kum 2014 khan Higher & Technical Education department chuan indigenous tih hi hrilhfiah turin Law & Judicial department-ah an thawn a ni.