KHAWTHLIR

M.Th. result
Senate of Serampore chuan tun hnai khan master of theology (M.Th.) result a tichhuak a, Aizawl Theological College aṭanga kum 2017-a M.Th. final exam hmachhawn mi 21-te an pass vek. First class grade A- ah mi pathum, second class grade B+ ah mi 13 leh second class grade B ah mi panga an pass a ni.

NLUP sem
Commerce & Industries department chuan, nimin khan Kolasib-a IPR conference hall-ah Kolasib bial chhunga NLUP dawngtute hnenah ṭanpuina an sem. NLUP semna hun hmanpuitu, bialtu MLA PC Zoram Sangliana chuan, ṭanpuina dawngtute chu a nihna tur ang taka ṭanpuina an dawnte hmang turin a chah. Ṭanpuina hi mi 159 hnenah Rs. 44,89,000 sem ral a ni.

Heroin man
Excise & Narcotics department chuan, nimin zing dar 6:30 vel khan khawchhak lam aṭanga rawn ken thlak heroin gram 26 leh a neitua puh Remnalala (33) s/o H Ramthanga, Champhai Vengsang leh Zoramsanga (42) s/o Vanlalhruaia, Ramhlun Venglai nia insawite an man. Nimin vêk khan Ramfangzauva (48) s/o Lalzuia (L), Bawngkawn nia inchhál hnen aṭangin heroin gram 15 an man bawk.

PMEGP thlirho
Lunglei District Level Task Force Committee on PMEGP chu nimin khan an chairman Lalzarmawii, Lunglei DC hoin a pisaah an ṭhukhawm a; kum 2016-17 chhunga PMEGP hnuaia Lunglei district chhunga bank awmte'n loan an pek chhuah dan an thlirho. DC chuan bank hotute chu PMEGP ngai pawimawh turin a chah.