MZP-in BJP MP thusawi an dem

MZP chuan thuchhuah siamin, Karnataka state Rajya Sabha MP Basawaraj Patil-a'n Chakma-te vuivaina thutaka ngai a, July 31, 2017-a Parliament House-a a tlangaupui chu ṭha lo an tih thu an tarlang a, "Thil nih phung zir chiang hmasa loa a chetna hi kan dem tak zet a ni," an ti.

MP Basawaraj Patil chu Chakma-te fin kherekna chiang zawka zir ṭha leh tur leh, Mizote an puhna chu a dik rêng em tih MZP zawt ve ngei turin MZP chuan an phût a ni.

MZP chuan, Chakma-te chu Bangladesh aṭanga dan loa Mizorama pêm lut an nih thu te, ADC an neih chakna hmangin document dik lo an insiamsak nasat thu te, chenna hmun ruahmansaktu leh ram neitute bei char chartu an nih thu te, Chanchinṭha hrilhtu Mizote nunna hial laksak duhtu an nih thu te, Chakma-te ram nghet nia an hriat Chittagong Hill Tract, Bangladesh chu UNO-ah luah lêt tura bei rengtu an nih thute an tarlang.

Mizoramah ram neitu Mizote'n an chanvo an chan ngei chu an chanvo dik a nih thu sawiin MZP chuan, "Thu dik lo leh belhchian dâwl lo hmanga min hêk rengtute hêkna thu thutak cheibâwla cheibáwl ṭhin political party an awm a nih chuan inen lêt turin kan a ngen a, kan ram tana him loa chet tum tan hmun zalen siam kan duh ngai dawn lo," an ti.

MZP chuan, Mizoram chhungah lawm nacháng hre lo mikhualte chunga ṭhat chhuah reng chu Mizote'n an ba lo tih an sawi a; dawh theih loh hun an nei a nih pawhin, Chakma-te cho chhuah a nih tur thu an puang bawk.