Police-in an uisathiam an pho chhuak

Mizoram Police chuan nimin khan Home minister Lalcham­liana hoin Police Headquarters-ah an uisathiam neih tharte pho chhuahna hun an hmang. Minister chuan, uisathiamte chu ṭangkai taka an hman a beisei thu a sawi.

Home Minister chuan, Mizoram Police-in kum 20 hma lamah uisathiam an neih ṭhin thu sawiin, "Hun rei tak nei loh hnuah kan nei leh hi a lawmawm. Vawiin hi Mizo mipui tan, a bik takin police tan ni pawimawh leh chhinchhiah tlak a ni. Kan ram a rálmuang a, sualna a tam lutuk lo. Hmun tinah ruihhlo a hluar a, rûkrûk tênau a thleng deuh reng a ni. Uisathiamte hi an ṭangkai dawn," a ti.

Covid-19 chung­changah police-te'n theihtawp an chhuah tih sawiin Lalchamliana chuan, "Che ṭha tâwk loa inpuhnate a awm a, han zir chian hian inpuhna maite a ni ṭhin. Social media hmang dik tâwk lote zawn chhuah kawngahte police-te an ṭangkai hle," a ti a; Covid-19 donaa police-te ṭangkaizia mipuiin an hriat thu a sawi. Kum 2018-19 khan Narcotics Control Bureau chuan dan loa ruihhlo tawlhrûkna do lêtna hmanraw pakhat atan Mizoram sorkar hnenah cheng nuai 18.40 a pe a, chu sum hmang chuan Mizoram Police chuan Bhogadi Kennels, Secunderabad aṭangin ui notê - German Shepherd Dog (GSD) leh Labrador Retriever pali ve ve a lei.

GSD chu pakhat Rs. 50,000 man leh Labrador Retriever chu pakhat Rs. 40,000 man a ni a; October 7, 2019 aṭangin Mizoram Police thlan chhuahte'n 'National Training Centre for Dogs', BSF Academy, Madhya Pradesh-ah ui enkawl dan an zir a ni. Ui pathum chu hnu chhui thiam an ni a, pathum dang chu ruihhlo chhui thiam niin, pakhat ve ve chu puak thei thil chhui thiam leh chhiatrupna a thlena tángte zawng thiam an ni. Uisathiamte hi kum khata a enkawlna senso chu Rs. 5,00,000 vel ni tura chhût a ni.