SRH-ZMC-a doctor-in Covid-19 a vei Veng pahnihin curfew an puan phah
State Referral Hospital (ZMC)-a Covid-19 hripui vei enkawltute zinga doctor pakhat chu Covid-19 a vei ve tih July 20, Thawhṭanni khan hmuh chhuah a ni a, a kài chhàwn theihte police hnuaia Contact Tracing Team-in an chhui zui mek. Hei vang hian Zuangtui leh Leitan vengte chuan an huam chhungah curfew an puang.
Grace Nursing Home & Research, Zarkawt leh City Hospital, Mission Venga thawktute chu July 20, Thawhṭanni zan dar 6-7 inkar khan Malsawma's Yard, Durtlang Leitanah futsal an khêl a, Covid-19 vei hmuh chhuah tâk doctor hi Grace Nursing Home lamah a tel ve a ni. Damdawi-in pahnih aṭang hian inkhelhnaah mi 15 vel ve ve an tel.
Doctor hi SRH-ZMC-a Covid-19 veite enkawltu zinga a tel avangin a khát tâwkin swab sample endik ṭhin a ni a, an endik hnuhnun ber result chu Thawhṭanni zana an inkhelh zawhah a chhuak a, hripui a vei tih finfiah a ni. ZMC hotute chuan Vanglaini palai zawhna chhángin, ZMC-a thawktute chu sample endik reng an nih avangin, doctor pakhatin Covid-19 a vei tih hmuh a nih avang hian endik nghal chûk chûk ngai an awm loh thu an sawi.
Malsawma's Yard-ah hian damdawi-in pahniha thawkte an inkhelh zawhah mi dang an inkhel ve leh a; hei vang hian Leitan veng chuan an huam chhungah nimin chhun aṭang khan curfew an puang. Leitan YMA hruaitute hnen aṭanga Vanglaini thu dawn danin, Thawhṭanni zan dar 7 hnu lamah an veng mi 50 chuang chu Malsawma's Yard-ah inkhèl turin an kal a; an veng kal zel dan tur chu nizan khan an rél a ni.
Covid-19 vei doctor chenna véng Zuangtui pawhin an huam chhungah nimin khan curfew an puang nghal. Vanglaini palai zawhna chhangin Zuangtui Local Task Force hruaitute chuan, doctor-in Zuangtui a tlawh hnuhnun ber chu July 12, 2020 kha a nih thu an sawi a, "Zanah riak loin duty turin a kal leh nghal. Inkhel tur pawh hian damdawi-in aṭangin a kal a nih kan ring," an ti.
Zuangtui LTF hruaitute chuan, doctor chênpuite swab sample chu nimin khan lâk nghal a nih thu sawiin, "An result azirin kan awm zel dan tur kan rél ang," a ti a; doctor chu an venga a kal hnuhnun ber July 12 a nih tawh avangin an ngaih a ṭhat deuh thu an sawi. Doctor-te nena inkhel zinga pakhat chuan Vanglaini palai zawhna chhángin, sorkar lam aṭangin amah an la biak loh thu a sawi a, "Kan damdawi-in hotute lam aṭangin fimkhur taka awm tura min rawn tih angin ka inkhung hrang nghal," a ti.
Contact Tracing Team-te chuan doctor-in Covid-19 a vei tih an hriat aṭangin a kài chhàwn theih awmte an chhui nghal a; he thu ziah lai thleng hian an la chhui zo lo. Vanglaini palai zawhna chhánga Contact Tracing Team hotute sawi danin, doctor hi a inkhelh ve avangin a kài chhàwn theih turte chhui chhung a rei. A kài chhàwn awlsam deuh tura an hriatte chu swab sample endik turin an ti a, result azira hmalak zel ngai turte a awm a ni.
Chanchin tlangpui
• SRH-ZMC doctor-te swab sample a khát tâwka endik ṭhin a ni
• Damdawi-in pahnih inkhelhnaah mi 30 vel an kal
• Covid-19 vei doctor-te inkhelh zawhah Leitan mi 50 chuang Malsawma's Yard-ah kalin an inkhel
• Hripui vei doctor-in an veng Zuangtui a tlawh hnuhnun ber chu July 12, 2020 a ni
• Doctor-in a inkhelhpui zingah sorkarin a la biakpawh loh an awm
• Covid-19 vei doctor-in a kài chhàwn theih âwmte Contact Tracing Team-in an la chhui zo lo