KHAWTHLIR

Myanmar lam mi Co­vid-19 veiin Salem Venga dawr pakhatah thil a lei nia hriat a nih vanga Salem Veng mi pasarihte swab sample endik result chu Thawhṭanni zan khan hriat a ni a, Covid-19 an kai lo vek. Hei vang hian Salem Veng Local Task Force chuan an huam chhunga curfew an puan pawh an sût nghal a ni.

Commisioner Lalkiamlova lehkhabu ziah 'Fairel bel' tih chu nimin khan Booth Mansion Hall-ah Agriculture minister C Lalrinsanga'n a tlangzarh. Minister chuan, lehkhabu ṭangkai tak, kut hnathawktute mai ni lo, mipui mimirin an hman ṭangkai theih tur a nih thu a sawi.

Lunglei Higher Secon­dary School NSS unit ­chuan nimin khan Lunglei Civil Hospital-ah thisen unit 8 an pe a, petute hi hmeichhia panga leh mipa pathum an ni.

Nimin tlai thleng khan Covid-19 dona atan Chief Minister's Relief Fund-ah cheng nuai 2,022 a lut tawh a, cheng nuai 1,243 hman tawh niin, hman loh nuai 778 a la awm. Nimin khan minister C Lalrinsanga chuan CM Relief Fund-ah hian a MLA fund aṭangin cheng nuai 25 a pe a ni.

Siaha DC Bhupesh Chaudhary chuan nimin khan Siaha District Hospital-ah Anti-Retroviral Therapy (ART) centre a hawng. DC chuan, health infrastructure lamah Siaha district-in hma a sawn ve zel thu a sawi. Sorkar thuchhuah tarlan danin, India ramah ART centre 50 a awm a, Mizoramah chuan nimina hawn tâk nen pathum a awm a ni.

State Referral Hospital-ah nimin khan Covid-19 vei mi pali dah luh thar an ni a, chutih laiin, SRH-a enkawl mek hripui vei mi 14 chu an dinhmun a ṭhat avangin Covid Care Centre (CCC)-ah nimin khan sawn an ni. SRH-ah hian Covid-19 vei mi 20 enkawl mek an ni a; ICU-ah mi pahnih, SICU-ah mi pakhat leh Isolation Ward-ah mi 17 an awm a ni.