CYMA bultumin ruihhlo do sawiho a ni ; Kuminah ruihhlo vangin mi 45 an thi tawh

Central YMA chuan nimin khan NLUP Conference Hall-ah ruihhlo do leh ruihhlo kaihhnawih dan chungchanga inràwnkhawmna an buatsaih a, chief minister Lal Thanhawla leh minister dangte'n an hmanpui. He hunah hian, kum 2017-ah ruihhlo vangin mi 45 an thi tawh tih tarlan a ni.

Inràwnkhawmna hi CYMA president Lalbiakzuala'n a kaihruai a; inràwnkhawmna huaihawt chhan CYMA general secretary Lalhmachuana'n sawiin, CYMA vice president Vanlalruata'n CYMA-in ruihhlo a do dan leh Mizorama ruihhlo kaihhnawih thilte a sawi.

CM Lal Thanhawla chuan, ruihhlo chu hnam hmelma, ṭhalaite leh naupangte thlenga suattu a ni tih sawiin, YMA chauh ni loin sorkar, kohhran, khawtlang leh chhung tinin an do rawn a pawimawh thu a sawi a, "Ruihhlo hi dan zawh famkima do theih pawh a ni lo a, ruihhlo zuartute pawh rei hrem an ni thei lo. Ruihhlo tawlhtute leh zuartute hremna na zawk hmachhawntir an nih theih nan ukilte pawhin hnam rilru puin, ruihlo case bikah chuan eizawnna thil pawh ni se, kut sil ngam tawh turin Zoram mipuite'n kan ngen a ni," a ti.

Ruihhloin nasa taka Mizoram a tihbuai chungchangah Mizo khawtlang nun pawh bihchian a ngai tih sawiin Lal Thanhawla chuan, "Cancer, HIV, naupang kumtlinglo khuaikhem, ram tihkan leh a dangteah Mizoram dinhmun a san avangin nun uluk tura pianthar a hun tawh a ni," a ti a; YMA-in ruihhlo a do chu sorkarin thlàwp zel a tum thu a sawi.

Chief Minister chuan, ruihhlo ngaite enkawlna home/centre-te chu sawiselna karah hna thawk chhunzawm zel tur leh insiamṭhat an ngaihna laiah insiamṭha turin a ngen a, "Sorkarin an thil tih ropui takte chu a thláwp a ni," a ti.

Inràwnkhawmnaah hian Home leh Excise & Narcotics minister R Lalzirliana, Law & Judicial minister Lalsawta, Social Welfare minister PC Lalthanliana, Health minister Lal Thanzara, parliamentary secretary KS Thanga leh sorkar hotu dangte an tel.

SRS chairman Vanlalruata tarlan danin, kumin 2017-ah ruihhlo vangin mi 45 an thi tawh a, chungte chu mipa 38 leh hmeichhia pasarih an ni. Kum 2016 chhung khan ruihhlo vangin mi 59, mipa 51 leh hmeichhia pariat an thi.

Chhinchhiah chinah, kum 1984 aṭanga kumin thlengin ruihhlo vangin mi 1,456 an thi tawh a, chungte chu mipa 1,300 leh hmeichhia 156 an ni.

Central YMA hnuaiah hian ruihhlo do turin ṭum hnih SRS din a ni tawh a, SRS din loh chhungin Central Anti Drug Squad (CADS) leh Flying Squad-te din a lo ni tawh bawk. CYMA hnuaia ruihhlo dotu pawlin kum 2005 aṭanga kumin thlengin heroin hawng 752 (kg. 12 vel) an man tawh.

Kum 2005 aṭanga kumin thlenga CYMA hnuaia ruihhlo dotu pawlte'n heroin an mante chu Rs. 20,61,34,620 (Nuai 2061.34) hû a ni a; chu'ng ruihhlo man kaihhnawiha man zinga mi 698 chu Excise & Narcotics leh Police hnenah an hlan a, home/centre-ah mi 419 dahin, mi 4,739 chu counselling pek an ni.

Kum 2017-ah hian heroin hawng 184.5 man tawhin, chu chu Rs. 3,59,68,285 hû a ni a, kum 2016 chhung khan heroin hawng 206 manin, Rs. 1,65,91,400 hû a ni. Kum 2016 chhunga heroin an man zat hi kumina an man tawh zat aiin a tam zawk a, mahse, an hralhna anga a hlutna erawh kum 2017-ah a sang zawk hle thung.

Mizoram State AIDS Control Society (MSACS) project director Dr Lalmalsawmi Sailo sawi danin, MSACS record-ah chuan ruihhloa inchiu ṭhin mi 8,584 zingah HIV hrik pai mi 1,215 an awm mek a; Mizoram pumah mipat hmeichhiatna aṭanga HIV hrik kai an tam laiin, Kolasib leh Champhai district-ah chuan mipat hmeichhiana aṭanga kai aiin, inchiuna hriau inhman ṭâwm vanga kai an tam zawk.