Kolkata Airport-ah rangkachak leh a kengtu Mizo man

Kolkata Airport-a security duty-te chuan August 3, Ningani chawhnu dar 2 vel khan Lengpui Airport aṭanga ṭum thlawhtheihna passenger, Mizo pa pakhat hnen aṭangin rangkachak kg. 6 vel an man.

Police aṭanga thu dawn danin, Lengpui Airport aṭanga Kolkata Airport-a ṭum Jet Airways-a chuang, rangkachak kengtu hi security duty-te chuan an hrêng mek a; rangkachak tawlhtu hi Lalhmingthangi w/o B Zokhuma, Bawngkawn Lunglei Road nia hriat a ni.

Kolkata Mizoram House-a Joint Resident Commissioner chuan Vanglaini palai zawhna chhangin, Kolkata Airport-a Mizo man chungchang hi an zawtfiah a, nimin chawhnu lam thleng kha chuan an la hriat chian theih loh thu a sawi.

Thu dawn danin, Lalhmingthangi hi December 14, 2015 zana Melthum daia rangkachak tlang 52 phurtu motor suam leh rangkachak rûkbo chungchanga hming lang zinga mi a ni.

Home minister R Lalzirliana'n May 11, 2016-a press conference a neih ṭuma a sawi danin, rangkachak phurtu motor suam leh rangkachak rûkbo chungchanga man Lalmuanawma Mathipi, Zonuam chu Lalhmingthangi, Bawngkawn hnuaiah rangkachak tawlhrûknaah an lo thawk dun tawh ṭhin a ni.

Dec. 14, 2015 zana rangkachak rûkbo thubuaiah hian khatih laia 39 Assam Rifles commandant Col. Jasjit Singh pawh inhnamhnawiah puhin man a ni a; nimahsela, rangkachak suam leh rûkbo thubuaia man zawng zawngte chu bail-in an chhuak mek a ni.

Hetih lai hian, police aṭanga thu dawnna chuan, December 14, 2015 zana rangkachak suam leh rûkbo thubuaiah hian police-te chuan Court-ah chargesheet an la thehlut lo a, prosecution sanction an nghak mek niin a sawi.