LDTA-te'n Lunglei FCI kudam aṭangin buhfai Phurh chhuah leh dah luh an phal lo - MTDA

Mizoram Trucks' Driver Association (MTDA) chuan, Lunglei District Truck Owners' Association (LDTOA)-te'n an member-te bak Lunglei FCI kudama buhfai dah luh leh phurh chhuah an phal lo tih an sawi a, "Sorkar thuneitute'n hma min laksak se kan duh hle," an ti.

MTDA hruaitute hian nimin khan Mizoram Truck Owners' Association (MTOA) pisaah thuthar thehdarhtute an kâwm a; an president Lalram-

luaha chuan, kum 15 kal ta vel aṭangin LDTA-te'n Lunglei kudam aṭanga buhfai phurh chhuah leh hmun danga dah an hauh vek tih sawiin, "District dang motor phurh an phal ngai lo," a ti a; LDTOA chu MTOA pawhin ṭum eng emaw zat an inhungbingna titawp tura an ngen tawh thu a sawi.

Lalramluaha chuan, June 30, 2017-a MTDA Executive Committee ṭhukhawmin, 'LTDOA-te hian an inhungbingna hi an ṭhiat a nih loh chuan July 5, 2017 aṭanga thu leh awm hma chuan Aizawl leh Kolasib district

aṭangin Lunglei motor reng rengin buhfai load an la tur a ni lo,' tih an pass thu a sawi a, "Sorkar thuneitute'n mipuite'n harsatna an tawh hmain hma min laksak se, a chinfel dan min ngaihtuahsak se kan duh tak meuh a ni," a ti.

LDTOA-te hian an member ni lote chu Lunglei FCI kudama buhfai dah an phal loh avangin kumin July 18, 29 leh 30 khan kudam chu tala-a an kalh thu sawiin MTDA President chuan, "Truck pariatin an buhfai phurh an unload theih loh avangin Lawngtlai FCI kudamah an unload a ni. Police lamin kalh lo turin ti mah se, an hawng ta chuang lo," a ti a; LTDOA hruaitute leh MTDA hruaitute inbiak hnuah pawh gate chu hawn a nih loh thu a sawi.

MTDA President sawi danin, buaina awm chhan ber chu, Chhingchhip lei a chhiat ṭumin, Aizawl aṭangin Hnahthialah buhfai a thleng thei lo a, Hnahthial kudam a ruak ṭêp a; chutih hun lai vêk chuan Lawngtlai kawng a chhe bawk a, Lungleiah buhfai a tam hle a, emergency-a Lunglei aṭanga Hnahthiala buhfai dah let tura ruahman a ni.

Lawngtlaia kal turte an kal theih loh avangin, Lunglei kudama leng lo buhfai dah tur a awm a; truck khalhtute chuan Hnahthialah emergency-in a divert theih tih an hriatin, direct challan siama kal ve an tum a, mahse, LDTOA President chuan Lunglei DCSO-in Lunglei motor phurh tur bik chauha a tih a nih thu a sawi a ni. Mahse, Supply Directorate chuan DCSO-in chutiang thuchhuah a siam loh thu an sawi thung.

MTDA ṭawiawmtu MTOA hruaitute chuan, LTDOA-te chu an inhungbingna titawp turin ṭum eng emaw zat an ngen tawh thu sawiin, "Kan ngennate an zâwm lo a, mahse, thawhhona chhiat kan hlauh avangin ngawih kan chuh. Supply department hotute hnenah pawh harsatna thleng hi kan thlen tawh a, chhanna a la awm lo. Mizorama buhfai phurh tur awm ang ang hi phur tlang dial dial ila kan duh dan ber chu a ni," an ti.

Carrying contractor-te pawhin buhfai an phurh theih loh thu sawiin, "Kan motor-a phurh an phal lo a, engmah kan thawk thei lo. DCSO chuan hna min pe a, mahse, awmzia a nei lo," an ti a; tender chhang ve tawh lo tura tihna lehkhate an dawn ṭhin thu an sawi.