Bangladesh-a Chakma-te Aadhaar Card siamsak ṭhin an ni - Tlabung MZP

MZP sub-headquarters, Tla­bung chuan thuchhuah siamin, India ram (Mizoram)-a Chakma-te'n Bangladesh ram chhunga awm Chakma-te Aadhaar card an siamsak ṭhin niin an tarlang.

Tlabung MZP chuan, tun hnaiah India sorkarin ration card nei tawhte'n Aadhaar card an nei tur a ni a ti a, Tlabung leh a chhehvel­ah pawh Aadhaar card chu India khua leh tui dik tak ta tur a ni tih an tarlang a; chutih laiin, Chakma ṭhenkhatte'n Bangladesh-a awm an chhungte ration card hmangin Aadhaar card an siam sak nia sawiin, ṭha lo an tih thu an sawi.

India rama Chakma leh Bangladesh rama Chakma-te inthliar hranna a awm dawn loh chuan Mizorama Chakma-te pawh foreigner ang vekin an en dawn a tih sawiin Tlabung MZP chuan, "Tlabung hi international boundary-a awm kan nih vangin Chakma te, a bikin India citizenship neih tumin an bei nasa a, a ṭhen phei chu lui hnár lamah kal chhoin, rinhlelh kai lo âwm taka awmin voter ID card an neih veleh khaw chhung velah inbenbel an tum ṭhin," an ti.

Tlabung MZP chuan, Chakma-te ration card siamsak leh Aadhaar card siamsak kawngah sorkar chu khauh leh fimkhur lehzual turin an ngen a ni.