PWD-in Kawngpui chhiat chhan sawifiah

PWD chuan thu­chhuah siamin, National Highway (NH) no. 6, Seling-Champhai kawng chhiat chhan an sawifiah a, "He kawng pawimawh tak hi Border Roads Organisation (BRO) hnuaia Project Pushpak enkawl reng ṭhin a ni," an ti.

PWD tarlan danin, Seling-Champhai kawng hi sorkar laipuiin March 4, 2014-ah NH atan puangin, NH no. 6 a pe a; February 17, 2015-ah Mizoram sorkar enkawl turin a ti. Mahse, a enkawl mektu BRO-in Mizoram PWD-ah hlàn mai loin kum hnih an enkawl zui a, chumi chhung chuan thawm ṭhat (resurfacing) a hun tawh hle chungin an thawm ṭha ngai lo a, kawng a chhe viau hman a ni.

Kawngpui chu Ministry of Road Transport & Highway-in Project Pushpak enkawlzui a phal tak loh avangin March 31, 2017-ah Mizoram PWD hnenah hlan a ni a, April 1, 2017 aṭangin Mizoram PWD kutah a awm ṭan.

BRO-in an hlan hma pawhin Mizoram PWD chuan an enkawl tur a ni ngei dawn tih hriain hma an la lâwk a, Seling-Keifang leh Kawlkulh-Khawzawl inkar siamna tur estimate siamin sor­kar laipui aṭangin sanction siam sa a ni.

Tunah hian contractor-in hna a thawk ṭan tawh a, Seling-Keifang chu a chanve vel an zo tawh a; ṭhál a nih ve leh chhunzawm a, thla hnih vel chhunga zawh theih an inbeisei. Kawlkulh-Khawzawl erawh chu a fel har deuh avangin alkatra hna an ṭan hman lo a, khuar hnawh hna thawkin, ṭhál leh chhung­a zawh an inbeisei a ni.

Sorkar kum kal meka hmabak la awm, Keifang- Kawlkulh leh Khawzawl-Champhai thawm ṭha turin MoRTH-in budget dahin estimate pawh thehluh tawh a ni a; sorkar laipui lamin an sanction hma theih chuan ṭhál awm leh turah hna ṭan theih an beisei bawk.