Health Minister-in sipai hotute a kâwm

Health & Family Welfare minister Dr R Lalthangliana chuan nimin khan a pisaah Assam Rifles (AR), Border Security Force (BSF) leh Border Roads Task Force (BRTF) hotute a kâwm a, Covid-19 a darh zel loh nana hmalak dan tur a sawipui.

Health Minister chuan, tun dinhmunah Mizorama Covid-19 vei mek 129 zinga 99 (76.74%) chu sipai leh para-military force, Mizorama awmte zinga mi an ni tih a sawi a; an mi leh sate Mizorama lo lut leh Mizoram aṭanga chhuakte uluk tak leh fimkhur taka chhinchhiaha en zui turin sipai hotute a hrilh.

Dr R Lalthangliana chuan, sipaite chu Mizorama an awm avangin fimkhur turin a hrilh a, "Mizoram sorkarin dan leh hrai zawm tur a siamte uluk tak leh fimkhur taka zawm tur a ni," a ti a; sipaite chu Mizoram hmun hrang hranga inzár pharh an nih avangin an fimkhur leh zual a ngaih thu a sawi.

Minister chuan, Mizoram hmun hrang hranga awm sipaite chu Covid-19 chungchanga inkaihhruaina ṭha taka zâwm tura hriattir tur leh uluk taka en zui turin sipai hotute a chah a, "Tuna sipai Covid-19 vei mekte enkawl dam an nih hnua an camp lama an kîr hunah pawh, sorkar ruahman angin ni sarih chhung uluk taka self monitoring tihtir ngei tur a ni," a ti.

Health department hotute leh AR, BSF leh BRTF hotute chuan, remchang hmasa berah sipai ho hmunah Covid Care Centre buatsaih dan tur an enho dawn a ni.