Khung hran leh endikna sênso Sorkarin a tumsak tawh dawn lo
Notification-ah hian mimalin inkhung hran leh swab sample endikna senso an pek dan tur leh a kaihhnawih hrang hrangah SDMA chuan kalphung tur a tichhuak nghal a; kalphung chu hlawm (category) pangaah ṭhen a ni.
Quarantine leh sample endik dan tura Mizoram sorkar ruahmanna thar
Category-A
Mizoram mi, state páwna hna nghet ni lo thawk (migrant worker), hna
aṭanga thlawn vanga tangkhang, July 31, 2020 ral hmaa Mizorama haw te, chhan dang vanga Covid-19 lockdown hma aṭanga Mizoram páwna awm, July 31 hmaa Mizorama haw, sum lama harsatna tak tak nei, DC-te'n an hriatpuite leh, inentira zin chhuak (medical refer case)-te chu order hian a huam lo a; sorkar quarantine facility-a an awm chhunga senso chu sorkarin a tumsak dawn.
Category-B
Mizoram mi leh sa leh hnam dang Mizorama cheng zawng zawng a huam. Mizoram pawn aṭanga an rawn luhin a tlem berah ni 14 chhung sorkar quarantine facility-ah an awm ang a, senso zawng zawng, sample endikna mante nen mahni intum a ngai; sorkarin a tumsak dawn lo. Quarantine facility-a senso tur hi ni 14 chhung atan DC-ah pêk lâwk a ngai.
Ei-in man Rs. 4,200
(Ni khatah Rs. 300)
Thlen man
* Deluxe Rs. 7,000
(Ni khatah Rs. 500)
* Standard Rs. 2,800
(Ni khatah Rs. 200)
* Ordinory Rs. 1,400
(Ni khatah Rs. 100)
DC-te'n an district ṭheuhah an ruahman ang.
Test man HFW dept. rate siam angin
Category-C
Mizoram páwn lam mi, hnathawhna vanga rawn zin ngai, sorkar official duty te, company, páwl leh mimal, hun rei lo tê chám tura rawn zinte a huam. Sorkarin an awmna tur bik hotel/hmun danga ruahmanah chauh thlen phal a ni a; thlen man leh ei leh in man leh thil dang reng reng sorkarin a tumsak dawn lo.
Quarantine facility an thlen veleh test an paltlang ang a, an negative chauhin an rawn kal chhan hna an thawk ṭan thei ang. An chàm chhungin an tlawh tur site/office-ah chauh an kal phal a ni a, hmun danga kal leh mi dang nena intlawhpawh phal a ni lo. Lirthei hman turah DC ráwn chunga uluk taka ruahman tur a ni a, mahni duh thua lirthei duh ang ang hman phal a ni lo.
Category-D
Hmasawnna ruhrel (infrastructure development) siam hna kal lai vanga PSU, company leh contractor-te'n hna thawktu tur an chah chhuahte a huam. An hnathawhna hmunah inkhung hranna tur a awm ṭha a nih chuan DC hriatpuinain ni 14 chhung an hmunah an inkhung hrang thei a; sorkarin Standard Operating Procedure (SOP) a siamte an zàwm tur a ni a, DC leh HFW department aṭangin dan an zawm leh zawm loh endik ṭhin a ni ang. Hmunhma an nei ṭha lo an nih chuan Category-B anga khung hran tur an ni.
Category-E
Mahni sensoa hotel emawa inkhung hrang duhte tana duan a ni. An awmna tur hotel emaw, thlenna dang DC-te’n an ruatah thlen theih a ni a, thlen man leh ei leh in man chu DC-te leh hotel/thlenna neitute inberáwnin an bithliah ang. Mikhual dang thlen phal a ni lo a, sorkarin kaihhruaina a siamte ṭha taka zawm tur a ni.
Airport aṭanga inlam dan
Thlawhtheihna hmanga Lengpui Airport-a thlengte chu khawi district-a kal tur pawh ni se, sorkarin lirthei a ruahman (empanelled taxi/rented car) emaw, anmahni lirthei, uluk taka driver nena dáidanna siam hmang chauha lam theih a ni. Sorkar ruahman lirtheia an kal a nih chuan, Aizawl DC-in rate a siam angin mahni intum tur a ni a; an thlenna tur quarantine facility an thlen hma chuan kawng lakah din khawmuan phal a ni lo.