Aizawla damdawi-in pahnihin thawktute an khung hrang

City Hospital, Mission Veng leh Grace Nursing Home & Research Centre, Zarkawt-te chuan, an damdawi-ina thawk zinga Covid-19 veite nena inkhelte chu khung hran nghal vek an nih thu an tarlang.

City Hospital chuan thuchhuah siamin, July 20 zana damdawi-in danga thawkte nena inkhelhnaa telte leh an mi leh sa dang­te chu quarantine nghal an nih thu an tarlang a, "Hetiang hi kan dinhmun a nih avangin páwn lam mi te, kan hospital rawn tlawh rih lo turin kan inngen e," an ti.

Thu dawn danin, City Hospital-a thawk zinga futsal khelhnaa kal mi 16 chu an in lamah khung hran vek an ni a, damdawi-in OPD leh Casualty chu khâr nghal a ni. Thawktu dangte chu kal rih lo turin an inhriattir a, staff zinga damdawi-ina kal hman mi 20 chuang chu damdawi-inah khung nghal an ni. Grace Nursing Home & Research Centre pawhin thuchhuah siamin, an damdawi-ina thawkte chu uluk takin counselling neihpui an nih thu leh khung hrang nghal vek an nih thu an tarlang a ni.