Lawngtlai Bawrhsap hoin sikserh ûmbo dan tur sawiho
Lawngtlai District Task Force & Committee on Malaria Elimination (DTFCME) chu nimin khan an chairman Dr Andrew H Vanlaldika, bawrhsap hoin DC conference hall-ah an ṭhu a, an district-a sikserh ûmbo dan tur an sawiho.
Dr Andrew H Vanlaldika chuan, sikserh chu natna hluar tak, fimkhurna aṭanga inven him theih a nih thu sawiin, "Malaria ûmbo tura sorkar hmalakna a hlawhtlin theih nan pawl hrang hrang an ṭan rual a, mipuiin thu an awih a ṭul. July-September chhung hi a tam lai a nih avangin fimkhur zual a, thosi lên zàr ṭhat te, thosi hlo kahtirte leh thosi keu theihna tui tling tihbote ngaih pawimawh zual a ṭul," a ti.
DTFCME co-chairman Dr Lalthlamuana, Lawngtlai CMO chuan, DTFCME chungchang sawifiahin, "Intensified Malaria Elimination Project (IMEP) hnuaiah February 2016 aṭangin India ram aṭanga malaria ûmbo turin hmalak ṭan a ni," a ti a; kum 2030-ah chuan ûmbo theih tawh ngei tum a nih thu a sawi. Meeting-a tarlan danin, Lawngtlai district-ah kum 2017-ah sikserh vei mi 2,902 hmuh chhuah niin, mi pathumin an thihpui a; kum 2018-ah sikserh vei mi 2,280 hmuh niin, mi pakhatin a thih phah. Kum 2019-ah mi 4,119-in an vei a, mi pali an thi a; kumin 2020-ah June thla thlengin sikserh vei mi 2,014 hmuh chhuah tawh niin, mi pali an thi tawh a ni.