Nasa zawkin infiamna hmun din tum a ni - Sports Minister
Mizoram State Sports Council (MSSC) chuan nimin khan an president Robert Romawia Royte, Sports minister hoin Secretariat conference hall-ah General Body Meeting an nei. Minister chuan, nasa zawkin infiamna hmunhma din tum a nih thu a sawi.
Robert Romawia Royte chuan, Externally Aided Projects (EAP) kaltlangin infiamna hmunhma leh ruhrelte din tum a nih thu sawiin, "Sorkarin industry-ah sport a puan hian kawngro thui tak a sut ka beisei. Hmun pangaa sport school sakna tur leh Mamita District Sports Complex sakna tur ruahmannate a fel tawh a, first instalment sum sorkar laipuiin a release tawh," a ti.
Sports Minister chuan, India ramah infiamna lam hmasawnna tura nikum lama sorkar laipuiin state level-a Centre of Excellence pariat dinna turah Mizoram a tel ve chu lawmawm a tih thu sawiin, "A puitlin nan theihtawp chhuaha hmalak mek a ni," a ti a; district level-a Centre of Excellence 1,000 dinna tur sorkar laipuiin a puan tawh chu Mizorama district eng emaw zatin an hmuh a beisei thu a sawi.
Covid-19 vangin tum anga kal theih a ni lo tih sawiin Robert Romawia chuan, "Covid-19 hi sport-in a tuar nasa a, department ang pawhin a tuar nasa pawl kan ni. Inkhàrkhip leh kaihhruaina avangin tun thlengin mipui pun khawmna tur infiamna buatsaih khap a la nih avangin infiammite fitness pawhin a tuarin a rinawm," a ti.
Sports Minister hian pension-a chhuak tur MSSC secretary C Laltlanthanga leh tun hnaia thi sports journalist Francis Paul te a ui thu a sawi bawk. MSSC hi kum 1976-a din a ni a, a hnuaiah sport association 32 an awm mek a ni.