Sorkar hnathawkte'n an hlawh an lâk hun tur hriat a la ni lo

Mizoram sorkara depart­ment hrang hrangin August 2022 thla hlawh tur Treasury-ah an thehlut tawh a, sorkar hnathawkte'n hlawh an lâk theih hun tur erawh hriat a la ni lo.

Sorkar sum dinhmun a ziaawm lai chuan sorkar hna a nghet loa thawk - muster roll, workcharge leh provisional employee-te hlawh chu ni 20 velah pek ṭhin a ni a, a ngheta thawk (regular)-te hlawh chu thla thar hmaa hna thawh ni (working day) hnuhnung berah pek ṭhin a ni tlangpui.

Mizoram sorkara department leh pisa hrang hranga hlawh buai­puitu drawing and disbursing officer (DDO)-te chuan August 2022 thla hlawh tur Treasury-ah an thehlut tawh hlawm a ni.

DDO-te hian sorkar hna­thawkte hlawh tur thla khata ni 20-na vel aṭangin treasury-ah an thehlut ṭhin a, August thla hlawh tur pawh August 20 aṭang khan pisa hrang hrangte chuan an thehlut hlawm. DDO-te chuan hlawh tur an thehluhin not pay before (NPB) an ziak tel ṭhin a, August thla hlawh turah erawh chuan treasury hotute'n ziak lo tura an tih angin an ziak tel lo.

Finance department aṭanga Vanglaini thu dawn danin, sorkar hnathawk nghette August 2022 hlawh tur pek theih hun tur hriat theih a la ni lo a, a nghet lote hlawh pawh pek chhuah hun tur hriat theih a la ni lo bawk.

Tarlan tawh angin, kumin July thla hlawhah, sorkar hnathawk nghet lote hlawh tur chu August 5-ah pek chhuah ṭan a ni a, a ngheta thawkte hlawh tur chu August 10-ah pek ṭan a ni thung.