Governor-in TB veite chaw a tumsak dawn

Governor Dr Hari Babu Kambhampati chuan nimin khan Raj Bhavan-ah National Health Mission (NHM) leh State Tuberculosis Cell hotute a kâwm a, an hnathawhte a sawipui. Larsap chuan, ngawr (TB) vei inenkawl mek zinga mi 20 tan thla tina chaw hrisel leina tur Nutritional Support a tumsak dawn tih a sawi.

Dr Hari Babu Kam­bhampati chuan, NHM hnuaia hmalakna zawng zawng nung taka kalpui mek a ni chu lawmawm a tih thu sawiin, "Mit leh beng enkawlna chungchangah, naupang kum 5 hnuai lamte uluk zawka enfiah theih dan awm se. TB ûm bona tura hmalaknaah district hrang hranga primary health centre-te thawmṭhat leh damdawi-in tênau zawka chil leh khâk endikna siam belh a ṭul," a ti a; TB veite inenkawlna uluk zawka vil turin State TB Cell hotute a chah.

TB enkawlna dam­dawiin ṭha taka hna a thawh theih nan TB vei enkawl mekte'n ei leh in tur ṭha an mamawh tih sawiin Governor chuan, TB vei inenkawl mek zingah khawsak harsa tam tak an awm avangin mi inphal, TB veite'n an ei leh in chaw ṭha thawhsak thei tan sàwmna a siam a; bul ṭan nan TB vei mi 20 tan chaw hrisel leina tur - Nutritional Support a tum sak dawn tih a sawi a ni.