Vawiinah MV Act 2019 hman ṭan a ni dawn ; Lirthei khû endik hun pawhsei a ni

Mizoram sorkar chuan vawiin September 1 aṭang hian Motor Vehicles (Amendment) Act, 2019 a hmang ṭan. Hetih lai hian, lirtheiin khû a tichhuak tam lo tih finfiahna, pollution under control certificate (PUCC) neih hun chhung bik chu September thla chhung pawhsei a ni.

Lirthei dan thar hi sorkar laipuiin a tihdang­lam (amendment) a ni a, sorkar laipuiin September 1, 2019-a hman ṭan turin notification chhuah mah se, Mizoramah hman a nih lawk loh thu leh sorkar laipuiin a nawr nasat avangin hman ve a nih dawn tâk thu Transport secretary KT Beicho chuan a lo sawi tawh a ni.

Dan tharah hian dan hmasa aiin lirthei kaihhnawiha dan bawhchhiate sum chawi tur nasa takin a pung a; chuvang chuan lirthei neitute'n an lirthei leh a kaihhnawiha thil fel lo awmte chinfel tumin dan thar hman a ni dawn tih an hriat aṭangin hma an la nghal a ni. Transport office bakah, insurance ti ṭhinte leh lirthei khû endikna hmunte an lûn hle.

Hetih lai hian, Mizoram Pollution Control Board (MPCB) chuan thuchhuah siamin, Transport Minister kaihhruaia Transport Director, MPCB Member Secretary leh Traffic SP ṭhukhawm chuan, PUCC nei lote chu September 30, 2022 thleng ngaihhnathiam tura an rêl thu an tarlang.

MPCB tarlan danin, lirthei khu endikna chu pisa kai hun chhung (office hour)-ah kalpui zel tur a ni a, tuna inziak lâwkte tih loh chu inziah lâwk tawh loh tur a ni.

Secretariat Complex-a lirthei khu endikna bikah chuan Sep­tember 1, 2022 thleng endik tura inziak lâwk an awm avangin September 2, 2022 aṭangin inziak lut lawk loin, a duh apiang tan lirthei endiktir hun hawn a ni ang.