Press ID leh sticker hman sual tihtawp theih dan tur sawiho a ni

Eizawnna atana media /chanchinbu hmang lo leh press mi ni lote'n press identity card leh 'press' sticker insiam chawpin an hmang ṭhin tih hriat a nih avangin, press ID leh sticker hman sual a nih lohna atana hma lak dan tur ngaihtuahin nimin khan Home secretary H Lalengmawia hoin a pisaah sorkar official-te an ṭhukhawm.

Ṭhutkhawmah hian sorkar official aṭangin Home Secretary bakah, DIG Lalhuliana Fanai, Aizawl DC Dr Lalhriat­zuali Ralte, Home addi­tional secretary Lal­hriatpuia, IPR director C Lalnunkima leh deputy director Mina Zoliani, MJA General Headquarters hruaitute leh Aizawl SP leh Aizawl Traffic SP aiawhte an tel.

Sorkar thuchhuah chuan, ṭhutkhawmah hian press ID leh sticker lem hmanga press dikna leh chanvo dik lo taka hmang ṭhin an awm tih sawi lan a nih thu a tarlang a, "Hei hi sorkarin a ngai thu tak hle a. Hetiang thil hi a awm zui zel loh nan meeting chuan ruahmanna siamin, hemi kawnga mawhphurtu hrang hrangte chu hmalak dan tur hriattir nghal a ni," a ti.

MJA General Head­quarters pawhin thu­chhuah siamin, press mi anga inlantira press ID leh sticker hmang sual an awm ṭhin chungchanga Home department hotute leh sorkar official dangte hmalaknaah an lawm hle tih an tarlang.

MJA tarlan danin, ṭhutkhawmah hian press mi nihna chungchanga dan leh kaihhruaina awmte sawi lan a ni a; press mi ni lo, press mi anga inlantira press ID leh sticker hmang an awm tawh lohna turin hmalak rêl a ni tih tarlangin, "Chu­tiang ti ṭhinte chu ti tawh lo tura beisei an ni a, ti lui zel an awm a nih chuan dan hmanga action lâk thlenga bawhzui dan tur an sawiho a ni," an ti.