SEDP ṭanpuina sum sem tur hawng

Sorkar flagship programme, Socio Economic Development Programme (SEDP) hnuaia ṭanpuina sum sem tur (family oriented) chu nimin khan Kolasib, Serchhip leh Mamitahte hawn a ni a, minister-te leh MLA-te'n an hawng.

Serchhip DC conference hall-ah minister Lalchamliana'n SEDP sum sem tur a hawng a; thu sawiin, sum sem thawh khatna chu kumin September leh October inkarah zawh hman beisei a nih thu leh kumin December leh nakkum January velah a thawh hnihna Rs 25,000 dang sem leh hman tum a nih thu a sawi.

Lalchamliana chuan, sum leh pai dinhmun azir zelin SEDP sem chhunzawm tum a nih thu sawiin, "Family oriented SEDP Rs 50,000 sema bul kan ṭan hi kan duhkawpa tam a ni bik lo a, sum leh pai kan neih milin kan kalpui rih mai a ni. Hei aia tam hi sem theih kan duh," a ti.

Lalchamliana hian SEDP dawng tura thlante hnenah leh Village SEDP Committee hnenah inenkawlna tur (administrative cost) bank lehkha (token) a hlân a ni.

Kolasib Diakkawn YMA Hall-a SEDP hawnna inkhawm chu minister of state K Lalrinliana'n hmanpuiin a hawng nghal a; thu sawiin, SEDP ṭanpuinaah hian chhung tinin eizawnna ngêlnghet an neih theih nan leh inkalpawhna ṭha nei tura kawng siam te, khaw tina tui in tur thianghlim hnianghnâr a awm theih nan leh êng chhit vek a nih theih nan te, ei leh bara intodelh theih nana department hrang hrang kaltlanga hmalak dan tur ruahmannate a tel thu a sawi.

Hawnna inkhawm hi bawrhsap John LT Sanga'n a kaihruai a, MLA pahnih Lalrinsanga Ralte leh K Laldawngliana te pawh an tel a ni.

Mamit Chhimveng YMA Hall-ah pawh MLA Lalrintluanga Sailo-in SEDP a hawng. MLA chuan, SEDP chu Mizoram chawikânna tur a nih thu sawiin, "Kum 2019 aṭangin Mizoram sorkar budget-ah dah a ni a, ruahmannaa tel lo hripui léngin kan tum anga kalpui thei loin min siam hnuah a taka kalpui theih a ni ta hi kan zavaiin lawm tur kan ni," a ti.

Mamit district tana SEDP hawnnaah hian MLA H Lalzirliana pawh a tel a; Mamit district-a MLA bial pathuma chhungkaw 4,500 -te bank account-ah line department kaltlangin a thawhkhatna atan Rs 25,000 ṭheuh thun a nih tur thu tarlan a ni.

Kolasib, Serchhip leh Mamit district-ah hian MLA bial pathum ṭheuh a awm a, bial tinah SEDP ṭanpuina sum dawng tur mi 1,500 zel thlan a ni a, Rs 2,5000 ṭheuh pek an ni ang.