BJP-in SEDP-ah Rs 25,000 aia hniamah Tawlhthla tawh lo turin sorkar an ngen

BJP, Mizoram Pradesh chuan thuchhuah siamin, cheng nuai 3 sem tiamtu MNF sorkarin SEDP hnuaia sum an sem tur Rs 50,000-ah an tihhniam hnuah Rs 25,000-ah an tihniam leh chu mak an tih thu an tarlang a; Rs 25,000 aia tlemah tawlh tawh lo turin sorkar an ngen.

BJP chuan, MNF sorkarin SEDP hnuaia Rs 3,00,000 sem an tiam an tihhlawhtlin theih loh hnuah, chief minister Zoramthanga'n Rs 50,000 sem a nih tur thu a puang tih an tarlang a, "BJP chuan Rs 50,000 bak tawlh sawn tawh lo turin kan ngen tawh a, nimahsela, tunah Rs 25,000 sem an ti leh ta a, mahni thutiama rinawm lo ram hruaitute chêt dan a ni," an ti.

Mizoramin sum leh paiah harsatna tam tak a tâwk mek tih sawiin BJP chuan, sum harsatnaah mipui aṭanga phuhrûkna tur zawn tum lo tur leh sorkar retheih vanga mizoram mipui tawrhna leh harsatna tawhte hrethiam turin Mizoram sorkar an ngen a; vehthlêm kual tawh loa mipui hnena an intiam ang sum sem mai turin an chah bawk.

Mizoram BJP chuan, minister ṭhenkhatin Rs 3,00,000 an sem hma chu an sem chhunzawm zel dawn anga an sawi chu thinrimthlak an tih thu leh mipui thluak sûk tumna a nih thu an tarlang a, "Mizoram mipui zahlohna lian takah kan ngai," an ti.