DC hoin bank-te hnathawh thlirho

Khawzawl district chhunga bank hrang hrang leh stakeholder line department kaltlanga hmalaknate thlirletin District Consultative Committee (DCC) chu August 30,2022 khan an chairman CC Lalchhuangkima, bawrhsap hoin DC conference hall-ah an ṭhukhawm a, June 2022 quarter tawp thlenga Khawzawl district-a bank-te hmalakna thlirho a ni.

Meeting-a tarlan a nih danin June 2022 quarter chhunga Khawzawl district-a bank hrang hranga pawisa dahluh leh pek chhuah tam zawng inthlauhna khaikhinna credit deposit ratio (CD ratio) chawhrual chu 69.37% a ni a, quarter hmasa March 2022 quarter tawpa CD ratio 66.11% aṭangin 3.26% in a pung a ni. Hei hian CD ratio ṭha ni tura hniam lam bituk zat 60% chu 9.37% in a khum a ni. Hemi hun chhung hian bank-ah cheng nuai 16421.06 dahluh a nih laiin bank-in pawisa a pek chhuah zat hi cheng nuai 11392.40 a ni.

2022-2023 Financial Year chhung June thla tawp thlenga Annual Credit Plan (ACP) hnuaia hnathawhte thlirho ni bawkin, priority sector atana target cheng nuai 2792 aṭangin cheng nuai 741.32 (26.55%) tihhlawhtlin a ni. Non priority sector hnuaia target cheng nuai 1399 aṭangin cheng nuai 486.80 (34.80%) tihhlawhtlin a ni. Hemi quarter chhung hian Pradhan Mantri Mudra Yojana (PMMY) kaltlangin Sishu hnuaiah mi 13, Kishore hnuaiah mi 27, Tarun hnuaiah mi 8, an vaiin mi 48 te hnenah loan cheng nuai 146 hu pek chhuah a ni bawk.

Kumin June quarter tawp thlenga Social Security Scheme hnuaia inziaklut tawh zat chu Pradhan Mantri Jan Dhan Yojana (PMJDY) hnuaiah mi 14050 , Pradhan Mantri Jeevan Jyoti Bima Yojana (PMJJBY) hnuaiah mi 7256, Pradhan Mantri Suraksha Bima Yojana (PMSBY) hnuaiah mi 9909 leh Atal Pension Yojana (APY) hnuaiah mi 329 an inziaklut tling tawh.

DCC ṭhukhawmah hian customer service tihchangtlun dan tur te, financial literacy campaign uar zawka kalpui dan turte leh bank leh ATM venhim chungchang sawiho a ni.