Mipui an inring, sorkar a inring lo - ZPM Ṭhalai

ZPM Ṭhalai chuan thuchhuah siamin, Motor Vehicles (Amendment) Act, 2019 a taka kalpui turah nasa taka mipui an inbuatsaih a, an inrin hle laiin, sorkar a inring ve lo a, a tlin lo zawkah a ṭang tih an tarlang.

ZPM ṭhalaite chuan, lirthei dàn thar September 2022 aṭanga kenkawh turah dan zawm tur in nasa takin mipui an inbuatsaih tih sawiin, "Aizawl leh Lunglei khawpui tih loh district khawpui dangah pollution test-na hmun tur a awm leh si lo a, dan zawm duh mipuite'n harsatna an tâwk nasa hle. Sorkar hian he dan kenkawh a tumnaah hian mipuite'n dan zâwm se a tih vang nge, mipui chêt sual chànga pawisa chawitir a tum hrim hrim vang tih hi kan zawhna a ni," an ti.

Aizawlah pawh pollution endikna hmunin mipui a dâwl zo lo tih sawiin ZPM Ṭhalai chuan, "Dan zâwm tura inbuatsaih mipuite'n harsatna nasa tak an tâwk mek a ni," an ti a; "Sorkar hian SEDP sem tur tuakna atan mipuite man a, pawisa chawitir hrim hrim a tum a nih ngawt loh chuan, district khawpui tina pollution test-na kháwl a awm kim hma leh Aizawlah pawh mipui dâwl zo khawp khawl a awm hma chuan dan thar hi kengkawh rih lo turin Mizoram sorkar kan ngen a ni," an ti bawk.

ZPM Ṭhalai hian sorkar lirthei hlui tawh tak tak, khû chhuah nasa tak takte'n pollution test an paltlang dan te, pollution tehna kháwlte chu rim taka hman a nih avangin a endikna a rintlak em tihte sawifiah turin sorkar an phût a ni.