Cabinet rorelah MNF party an lawm

MNF party chuan thuchhuah siamin, August 30, 2022-a Mizoram Council of Ministers ṭhukhawm rorelte chu lawmawm an tih thu an tarlang a, "Mizoram tana ṭha tur an ngaihtuah kawngah Council of Minister-te chhuanawm kan ti hle," an ti.

MNF chuan, The Mizoram Liquor (Prohibition) Draft Rules, 2022 ngaihtuah ṭhat a ni tih sawiin, "Mizoram chhunga kut hnathawktute grep thar aṭanga dan hnuaia wine siam leh hralh phal a ni tur hi lawmawm kan ti. Champhai leh Hnahlan lama grape chíngtute'n dan hnuaiah ngaihngam taka an thawh rim rah an seng tur hi thinlung takin kan lawmpui," an ti a, Mizoram economy siamṭhatu an nih ngei an beisei thu an tarlang.

Hun rei tak hlawh pung loa thawk tawh Samagra Shiksha hnuaia thawkte chungchangah MNF chuan, "Samagra zirtirtu mi 5,000 dáwnte dinhmun siamṭhatsak nan DA 15% leh medical allowance bakah, an thawh rei dan azirin allowance pek sorkarin a remti hi kan lawmpui hle," an ti.

Cabinet-in Mizoram Sports Incentive Cash Award 2022 thar a pawm chu MNF chuan lawmawm an tih thu an tarlang. An tarlan danin, Cash award dan thar ang chuan, Olympic-a gold medal latu hnenah cheng nuai 100, silver medal latu hnenah cheng nuai 75 leh bronze medal latu hnenah cheng nuai 50 pek a ni dawn.

Commonwealth Games emaw, Asian Games emaw, Youth Olympic Games emawa gold medal latu hnenah cheng nuai 25, silver medal latu hnenah nuai 15 leh bronze medal latu hnenah nuai 7.5 pek tur a ni thung. International leh national-a Mizoram tana lawmman latute hnenah sum fai pek tur zat bithliah a ni bawk.

MNF chuan, sorkar department hrang hranga contract employee-te hnena dearness allowance 10% pek remtih a ni chu lawmawm an tih thu leh thawktute an lawmpui tak zet thu an tarlang bawk a ni.