Lalsawta hoa sorkar ṭha siam mipuiin an nghakhlel - H Rohluna

MPCC general secretary H Rohluna chuan nimin khan Kolasib-a Taitesena Hall-a inkhawmah thu sawiin, Mizoram sum leh pai dinhmun tlachhe mek siamṭha tur leh mipui huapzo sorkar siam turin mipuiin MPCC president Lalsawta an ring tâwk nia sawiin, "Mizo mipui, a hre chiang apiangte'n Pu Lalsawta hoa sorkar ṭha siam min duhpuiin an nghakhlel em em a ni," a ti.

H Rohluna chuan, MNF sorkar chu an sorkar hmasak lai pawha leiba thanga Mizoram awhtirtu an nih thu sawiin, "Chu leiba laka Mizoram min chhan chhuaktu chu tuna MPCC president leh kan chief ministerial candidate Pu Lalsawta hi a ni. MNF symbol hi arsi a ni a, khaw thimah a lang chiang ṭhin ang hian a lan apiangin Mizoram hi thimin min tlak buak a, a en zual zel i hlau ang u," a ti a; sorkar mek kal dan chu mipuiin an nuihzat a, an lakah beiseina an nei lo niin a sawi.

ZPM chungchang sawiin H Rohluna chuan, bél keh phuar khawm, tui pâi thei lo ang an nih thu a sawi a, "Anmahni party chhungah an la buai tâwk em em rih a, mahni party chhungkua pawh chingfel thei lote hi Mizoram kaihruai tur khawpin mipuiin an la ring lo a ni," a ti.