MLA-in zirlai lawmpuina a hmanpui

MZP Headquarters, Zawlnuam chuan nimin khan Zawlnuam College hall-ah zirlai pass tharte chawimawina hun an buatsaih a, bialtu MLA Lalrindika Ralte-in a hmanpui.

Hachhek bialtu MLA Lalrindika Ralte chuan, mihringte chu khawvela an awm chhungin an theihna sang ber hmang tur an nih thu sawiin, "Pathian hian zalên taka hun kan hman a remti a, mahse, Bible-in a sawi angin rorelsakin kan la awm dawn tih kan hriat reng a ngai," a ti.

Mihring tihlutu, hman tlaka siamtu chu zirna leh thiamna a ni tih sawiin Lalrindika chuan, "Thiamna chu mahni hlâwkna tur ringawt a ni tur a ni lo a, mahni inchinfel theih ringawt lam a ni lo. Mi dangte tana malsawmna kan nih theihna atan thiamna kan paw chhuak tur a ni," a ti a; chapona chu hmasawnna dâltu a nih avangin thiamna leh theihna an neihte chu chapopui lo a, a petu Pathian chawimawi nan hmang turin zirlaite a chah a ni.