Hripui vei enkawl lai mi 460 an awm

August 30, Thawhlehni khan Mizoramah Covid-19 vei mi 118 hmuh chhuah a ni a, August thla chhungin mi 4,285 hmuh chhuah a ni tawh. Nimin khan hripui vei dam tawh mi 108 chhuahtir an ni a, Covid-19 vanga thi an awm lo. Nimin tlai khan hripui vei enkawl lai mi 460 an awm.

Thawhlehnia Covid-19 positive hmuh thar mi 118-te chu mipa leh hmeichhia 59 ve ve an ni a, rapid antigen test hmanga hmuh chhuah vek an ni. Swab sample endik zat 829 aṭanga positivity rate chu 14.29% a ni.

Covid-19 vei zinga dam tawh mi 108 chu nimin khan chhuahtir an ni a; district tina chhuak zat chu - Aizawlah mi 29, Lawngtlaiah 16, Lunglei leh Mamitah 12 ve ve, Champhai leh Saitualah 11 ve ve, Serchhipah panga, Siahaah pali, Kolasib leh Khawzawlah pathum ve ve leh Hnahthialah pahnih a ni.

IDSP record angin, Mizoramah Covid-19 vei 2,37,085 hmuh chhuah a ni tawh a, mipa 1,10,414 leh hmeichhia 1,26,670 an ni a, mipa aiin hmeichhia 16,257-in an tam zawk. Nimin tlai dar 5 thleng khan mi 2,35,905 (99.50%) chhuahtir an ni tawh a, mi 720 (0.30%) thi tawhin, enkawl mek mi 460 (0.20%) an awm.

Kum 2011 chhiarpui angin, Covid-19 vei hmuh tawh 2,37,085 chu state mipui zat aṭangin 21.61% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.