NHIDCL leivûng paih danah hma la turin EFCC dept. phût

Youth for Environment Justice Mizoram (YEJM) chuan nimin khan Prin­cipal Chief Con­servator of Forest (PCCF) hnenah lehkha thehlutin, NHIDCL leh an hnuaia thawk contractor-te leivung paih danah Environment, Forest and Climate Change (EFCC) department-in hma a lâk loh chuan lung­awi lohna an lantir leh dawn tih an hrilh.

YEJM chuan, NHIDCL kawng laihin environ­ment dan zawng zawng an bawhchhia nia tar­langin, "Ram leilung fate zahpahna nei loin kawng an lai a, leivûng leh hnawmhnawk paihna (spoil bank & dumping area) an siam mumal loh avangin kawng thlangah an nawr liam ṭhin. Leivûng tam takin thing leh mau chhiar sên loh an tichereu a, a hmuna cheng nungcha a tichimit a ni," an ti.

Leivûngin kawng laihna hmun zawng zawnga luikawr leh luite a tichhia tih sawiin YEJM chuan, "Tuihna a kang chat nasa. May thlaah ṭo ruah bawhawk a sûr a, leivung chu chirhdiakah a chang a, kan luipui zawng zawng chirh diakin a luang dûl dûl a, luia cheng nungchate tan dam khawchhuah ngaihna a awm lo a ni," an ti a; leivûngin mi tam tak eizawnna pawh a tihchhiat thu an tarlang.

YEJM chuan, an hruai-tu Vanramchhuang­i'n May 2022 khan PCCF hnenah NHIDCL-te kawng laih titawp tura ngenna a thehlut tih tarlangin, "Lehkha a thehluh pah hian PCCF-in stay order a pek phûtin EFCC pisa kawtah silent strike a nei nghal a. Pi Vanramchhuangi hi ṭhalai tam takin an thlàwp tâk avangin YEJM pawh hi May 30, 2022 khan a lo piang a ni," an ti.

Mizoram Pollution Control Board leh DFO tinin NHIDCL chu stay order an pe chhungin an ngai pawimawh lo tih tarlangin YEJM chuan, "EFCC department-in vawiin thlenga hmalak zuina a nei lo hi kan hrethiam thei lo a ni," an ti. Nimina an lehkha thehluh a hmuh aṭanga chawlhkar khat chhunga hmalakna a awm loh chuan EFCC kawtah lungawi lohna an lantir leh dawn thu PCCF chu an hriattir a ni.