KHAWTHLIR

Thisen pe
Manchester United Supporters' Club, Mizoram chuan an din champha vawi thumna pualin nimin khan thisen pek an huaihawt. Aizawlah chuan Civil Hospital, Aizawl blood bank-ah thisen pek huaihawt niin, mipa 65 leh hmeichhia pangate'n thisen unit 70 an pe a, hmun dangah mi paliin thisen an pe bawk.

Kuhva rah man
Champhai police-te chuan August 30, Thawhlehni zing khan Myanmar aṭanga dan loa kuhva rah lak luh ip 76 (kg. 6,000) an man. Kuhva ro phurhna lirthei pahnih khalhtu Lalramluaia, Bulfek khua leh Lalramnghaka, Champhai Bethel Veng te an man bawk.

Lawngtlai DC-in Sikul a endik
Lawngtlai DC Amol Srivastava chuan nimin khan Lawngtlai khawpuia sikul pariat a tlawh a; an mamawh leh dinhmun hrang hrang - chawchhun an chhum dan, a thianghlim leh thianghlim lohte a endik. Zirtirtute'n an harsatna an lo thlente chu a theih ang anga bawhzui a tum thu a sawi.

Chhumbél sem
Environment, Forests & Climate Change (EFCC) department, Chhimtuipui Wildlife Division chuan nimin khan ram humhalh an enkawl - Ngengpui Wildlife Sanctuary chhehvel khaw 13-a chhungkaw 620 leh Phawngpui National Park chhehvel khaw 11-a chhungkaw 580 hnenah chaw chhum bél (pressure cooker) pahnih ṭheuh an sem. Cooker sem turte hi Lawngtlaia EFCC pisa kawt aṭangin Lawngtlai East bialtu MLA H Biakzaua'n a vailiam a ni.

FRP hatchery bun
Laldenga Fisheries Demonstration Farm, Lengpuiah nimin khan ṭum khata sangha tui nuai 10 vel keutir theihna FRP hatchery khawl bun a ni. FRP hatchery hi Central Agriculture University hnuaia College of Fisheries, Tripura bultumin Centre of Excellence on Fisheries and Aquaculture Biotechnology Phase-II hnuaiah bun a ni.