Sorkar laipui Inter Ministerial team-in Mizorama chhiatna thlen dan enfiah

Sorkar laipuia Inter Ministerial Team chuan, tunlai hian kumin June 12 aṭanga tun hnai thlenga Mizorama ruahsur nasa vanga chhiatna thlengte a hmunah an enfiah mek a, Inrinni khan Khawthlangtuipui lianin a tihchhiatte leh mipuiin an tawrh dante a hmunah an enfiah.

Central Inter Ministerial Team hi Minis­try of Home Affairs-a joint secretary Dilip Kumar-a'n a kaihruai a; Bihar Rice Develop­ment director Dr Virendra Singh, FCT assis­tant director BK Mishra, executive engineer Pradeep Kumar Lal leh Rural Development assistant rirector Mohit Verma-te an tel.

Central Team Tlabung khaw chhunga Khawthlangtuipui lianin chenna in a tih­chhiatna hmun hrang hrang an tlawh a; Mizoram sorkara department hrang hrang hotute leh khawtlang hruaitute thil awm dan an zawt a, harsatna tawkte an titipui bawk.

Tlabung YMA Rúna inkawm khawmnaah Tlabung V/C president Thangkhuma chuan, sorkar laipui tirha mi pawimawhte'n Tlabung an tlawh chu thlamuanthlak an tih thu a hrilh a; chhawmdawl hna thawktu mi tlawmngaite inpekna vangin tuilian vanga chhiatna lian tham zawk thlen belh thei eng emaw zat pumpelh a nih thu a sawi.

Central team member-te chuan, Mizoram sorkarin sorkar laipuia estimate a thehluh enfiah tur leh chhiatna thlen dan kimchang zawk zir chiang tura Mizoram rawn tlawh an nih thu an sawi a; chhiatna thlen dan a hmuna an zir chiannaa an thil hmuhte chu chawlhkar hnih chhunga thehluh hman an inbeisei thu an sawi.

Inter Ministerial team hotute sawi danin, Mizoram sorkarin kumin fûr chhunga chhiatna hrang hrang tuarte ṭanpui nan sorkar laipuiah cheng vbc. 115 hû estimate a thehlut a ni.

Tun ṭuma Inter Ministerial team-te'n Mizo­ram an tlawh chhan chu, tun hnaia prime minister Narendra Modi-a'n hmarchhak state chief minister-te nen an ṭhutkhawm ṭuma hmarchhaka khuarel chhiatna tuarte tan cheng vbc. 2000 ruahman a nih thu a puan tihhlawhtlinna tura bawhzuina a ni.

Central team-te'n Tlabung an tlawhnaah hian Lunglei DC aiawhin assistant settlement officer Daniel Sailo leh Tlabung SDO(C) mawhphurhna la mektu V Lalmuanpuii ten an ṭawiawm a ni.

Inter-Ministerial team-te hian August 4, Zirtawpni khan Aizawl an rawn thleng a, August 4 vek hian Aizawl DC Kannan Gopinathan leh Disaster Mangement and Rehabilitation (DMR) department hotute nen Sairanga Tlawng lui lian sûlhnu leh a tihchhiatte an enfiah nghal.

August 4 zanah State Guest House conference hall-ah DMR secretary Zothan­khuma leh officer dangte'n Mizorama chhiatna thlen dan an hrilhfiah a; Agriculture, PHE, Power & Electricity leh department dang officer-te leh district hrang hranga Sub-Deputy Commissioner-te an tel.

Central Inter-Ministerial team hian nimin khan Aizawl khawpui chhung hmun hrang hranga chhiatna thlengte an enfiah leh a; Chief Minister leh Chief Secretary an kâwm bawk.