Keifang-ah MCAB branch thar hawng

Minister R Lalzir­liana, Ṭawi bialtu chuan nimin khan a bial chhung Keifangah Mizoram Coope­rative Apex Bank Ltd., Keifang Branch a hawng.

R Lalzirliana chuan, Apex Bank branch thar chu Keifang khaw mipui leh a chhehvela chengte'n an chhawr ṭangkai a beisei thu sawiin, "Tun hnaiah Apex Bank-in hmasawnna neia a kal zel hi a lawm­awm hle a ni," a ti. Apex Bank chu Mizote bank, Mizoram mipui tana ding a nihna anga mipui rawngbawl tura hmasawn zel turin duhsakna a hlân.

Mi rinawm, taima tan bank chu sum thawh chhuah tlem lua awm loa dah khawlna, eizawnna atan leh lei rem rahna atana loan lâk theihna a nih thu sawiin R Lalzirliana chuan, "Bank hlawhtling tur chuan thawktu rinawm a pawimawh a, biak nuam leh mi tana inpete chuan mi an híp ṭhin," a ti. Nimina hawn tâk nen hian Mizoram Cooperative Apex Bank Ltd. chuan branch 21 an nei tawh a; thawktu nghet 159 nei mek­in, thawktu zawng zawng Mizo vek an ni.