Rangkachak man kengtu Zonunsanga nia hriat a ni

August 3, 2017 chaw­hnu dar 2 vela Kolka­ta airport, Netaji Subhas Chandra Bose Interna­tional Airport-a rangka­chak kg. 9 chuang, cheng nuai 300 vel hû kengtu an man chu Zonunsanga (27) nia thu dawn a ni.

Police aṭanga thu dawn danin, rangkachak kengtu an man hi Jet Airways flight 9W-624 hmanga Lengpui Airport aṭanga Kolkata Airport pan passenger zinga mi a ni a, rangkachak tawlhtu chu Lalhmingthangi w/o B Zokhuma, Bawngkawn Lunglei Road nia hriat a ni.

Thu dawn danin, rang­kachak kengtu hian Lengpui Airport securi­ty paltlang mah se, Kol­kata Airport security erawh a paltlang thei lo a, Directorate of Revenue Intelligence (DRI) mite'n an lo man a ni.

DRI official-te chuan, rangkachak an man chu tlang paruk, a vaiin kg. 9.96-a rit (tlang khat kg. 1.66) a nih thu leh cheng nuai 300 vel hû a nih thu an sawi a, "Rangkachak kaihhnawiha man hi mi vengva tak, Delhi University-a zir ṭhin niin a insawi a, rangkachak tawlhrukna dangah pawh a inhnamhnawih tawh niin a insawi," an ti.

Hetih lai hian, Kolkata Mizoram House-a Joint Resident Commissioner chuan Vanglaini palai zawhna chhangin, Kolkata Airport-a Mizo pa man chungchang zawtfiah mah se, an la hriat chian theih loh thu a sawi.