Birth certificate dik lo petu chhui mek Birth certificate dik lo petu hrem nual tawh

Economic & Statistics department hnuaia dan loa Chakma unau pahnih hnena birth certificate petu nia hriat, Register of Births and Death (RBD) khawihtu Sura Bindhu Chakma chu Planning and Programme Implementation department-in an chhui mek. Birth certificate dik lo pek vangin a pe chhuaktu hrem an awm nual tawha thu dawn a ni.

Thu dawn danin, Bora­pansury-I khuaa RBD Sura Bindhu Chakma chuan October 10, 2011 khan Chakma mipa naupang pakhat chu June 2, 1996-a piang angin birth certificate a pe chhuak a, a farnu pakhat pawh January 7, 1997-a piang angin birth certificate a pe chhuak bawk.

Birth certificate-a Chakma unaute pian hun inkar hi thla ruk chauh a nih avangin tun hnai khan man chhuah a ni a, action lak nghal a ni. Chakma unaute hi an pianna hmun chu Borapansury-I, Lawng­tlai district a ni a, an pa hming chu Sukra Lonmi Chakma niin, an nu hming chu Rangali Chakma a ni a, October 7, 2011-ah register an ni.

Planning secretary Dr C Vanlal­ramsanga chuan, Sura Bindhu Chakma lakah action an lak dawn thu a sawi a, "He local register lakah hian action kan la dawn a, social media-a a làr hmain kan hriat rualin hma kan la nghal. Sorkar hnathawk a ni a, dan angin explanation kan call phawt ang a, evidence a finfiah theih loh chuan RBD aṭangin a báng nghal ang," a ti.

Dr C Vanlalramsanga chuan, RBD hna chu a pawimawh thu leh hmun dangah pawh action lak an neih tawh thu a sawi a, "Birth certificate hi India ram chhunga piangte chhinchhiahna a ni a, kum 2015-ah pawh khan khaw pahnihah birth certificate dik loa pe chhuak kan hriat chu kan hriat rualin kan lo ûm zui tawh," a ti a; Champhai district, Lunglei district, Mamit district leh Lawngtlai district-te chu birth certificate dik lo hluar zualna a nih thu a sawi.

Economic & Statistics Direc­torate-a thawkte chuan, Bora­pansuri-a RBD SB Chakma-a'n Chakma unau birth certificate a pek chhuah chu office record-ah a awm lo niin an sawi a, Chakma foreigner-te birth certificate pek an nih loh nan theihtawpa an vên ṭhin thu an sawi bawk.

Birth certificate hi nau pian aṭanga ni 21 chhungin man chawi loa lak theih a ni a, ni 21-30 inkarah Rs. 100 chawiin a lak theih. Ni 30 aṭanga kum khat hnu lam chu delay certificate tih niin, first class magistrate phalnain Economics and Statistics directorate, district office leh Aizawla district research officer aṭangin lak theih a ni.

The Mizoram Registration of Births and Death (Amendment) Rules 2015 Section 3, sub no. 3-ah chuan, kum khat chhunga ziah luh a nih loh chuan Judicial Magistrate first class order nen Rs. 1,000 chawiin birth certificate lak theih a nih thu a chuang. SB Chakma hian dân anga delay certificate pe chhuak turin magistrate phalna a nei lo niin an sawi.

Planning Secretary sawi danin, The Registration of Births and Death Act 1969 hnuaiah delay certificate hman sual a nih fo avangin sorkarin kum 2015-ah dân a siam thar phah. August 4, 2015-ah sorkarin hriattirna a tichhuak a, 'The Mizoram Registration of Births and Death (Amendment) Rules 2015' tih a ni a, eng emaw zat tihdanglam a ni a, August 4, 2015-ah government gazette-ah chhuah a ni.

Dr C Vanlalramsanga chuan, kum 2015 vêk khan village council, local council leh kohhrante hnenah birth certificate chungchangah dik taka tih a nih theih nan ngenna an thawn tih a sawi. Economic & Statistics Directorate-a thawkte sawi danin, Aizawlah pawh birth certificate dik lo an man fo. Infiammite zingah dik lo taka tih tum leh mi ṭhenkhat, HSLC certificate-a an kum mila birth certificate dil tum man chhuah an nei ṭhin. Mizoramah RBD mi 842 an awm mek a, khaw ṭhenkhatah chuan sorkar hnathawk dah tur an awm lo.

Birth certificate chu India khua leh tui nihna a ni lo tih sawiin Economic & Statistics depatment hotute chuan, "ID siam dawnah birth certificate an lo phût ṭhin a, Myanmar emaw, Chakma emaw pawh ni se, birth certificate hi neih ngei ngei an tum phah vek a ni," an ti.