Thingsulthliah leh a chhehvel khuaten Saitual district-a tel duh loh thu puang

Saitual District Implementing Demand Committee-in an demand area-ah Thingsul­thliah tlangdunga khuate an telh chu, Thing­sulthliah tlangdunga All NGO leh V/C ­ṭang­rual Joint Action Committee leh Thing­sulthliah Ṭhalai Pawlte'n an duh loh thu thuchhuah siamin an puang.

Thingsultliah Tlangdung JAC chuan, Saitual district tihpuitlin a nih pawhin, Thingsulthliah tlang dung chu a huam chhungah dah a nih chuan a tàwp thlenga dodal an tum thu an tarlang a; V/C-te pawhin a ṭul dan azirin an lungawi lohna lantir nan seal thehluh thlengin hmalak an huam thu an sawi.

Thingsulthliah Ṭhalai Pawl chuan, Saitual District Implementing Demand Committee (SDIDC)-in tun hnaia district tihpuitlin phûta hma an la chu Mizoram dinhmun ngaihtuahin âwm lo an tih thu an tarlang a, "Zoram hi an hmangaih a nih chuan Saitual district tihpuitlin an ngiat hi bànsanin titawp nghal se kan duh hle," an ti.

SDIDC-in Saitual district-a awm tura Thingsulthliah tlangdung - Sesawng, Seling, Thingsul-Tlangnuam, Thingsulthliah, Dar­lawng, Tlungvel leh Phulmawi-te an rín lut chu âwm an ti lo a, a dodal thu an tarlang bawk.

Kum 2008-a Saitual district puan tawh tihpuitlin phûtin SDIDC huaihawtin July 31, 2017 khan Saitual leh a chhehvel khaw mipuite'n Saitualah kawng an lo zawh tawh a, in tinah puan var an tár bawk.

August 1 khan SDIDC hruaitute'n chief minister Lal Thanhawla hmuin, an thil phût an hrilh a, chief secretary Lalmalsawma pawh an hmu a ni. Chief Secretary hian SDIDC thil phût chungchang chu sorkarah thlen a nih thu leh Cabinet kuta awm a nih tawh thu a lo hrilh a ni.