Aizawl Mayor-in hmanrua sem

Aizawl Municipal Corporation (AMC)-in oxygen concentrator, water cooler, aurinna hmanrua, stablizer leh searchlight an leite chu AMC Ward-VIII chhunga khawtlang mamawh phuhrûk nan Aizawl mayor PC Lalhmingthanga'n khawtlang hruaitute hnenah a hlân.

Hmanraw hlanna inkhawm hi Armed Veng South community hall-ah neih a ni a; Mayor chuan, kum 2016-17 chhunga AMC-in property tax a khawn chu Rs. 2,18,05,351 a ni tih sawiin, chu'ng zinga 80% chu mipui tan hman tura tih a nih thu a sawi a, Ward Com­mittee-in a hman dan tur a rèl ang zelin an mamawhte leisak nan hman a nih thu leh, Ward VIII hnena an hlante pawh property tax aṭanga sum hmuh hmanga lei a nih thu a sawi.

PC Lalhmingthanga chuan, AMC ward hrang hranga hma­sawnna hna thawh nan Rs. 1,45,12,838 hman a ni tawh a, chu'ng zinga Rs. 22,74,250 chu bungraw lei nan hman a nih thu a sawi a; kum 2016-17 chhung khan Aizawla in 28,757 aṭang­in property tax lak a nih thu a sawi bawk.