TJ Lalnuntluanga'n lirnghing tuarte a tlawh

Minister of state TJ Lalnun­tluanga chuan nimin khan East Tuipui bial chhunga lirnghing tuar khaw ṭhenkhat - Leisenzo, Leithûm, Dungtlang, Samthang, Vaphai leh Farkawn khuate a tlawh.

TJ Lalnuntluanga chuan, lirnghing vanga mipui thlabàrna chu sorkarin a hria a, a ṭul anga hma lain theihtawp a chhuah thu a sawi a, "A hmun ngeia kala thlamuan tura lo pênchhuak kan ni. Lirnghing tuarte tawrhpui a, inlènpui a, inhnem chu kan rawn ken hmanraw lian ber a ni," a ti.

Ṭul leh mamawh ang zel­in state sorkar leh district thu­neitute'n theihtawp an chhuah zel dawn thu sawiin Minister chuan, "Khuarel chhiatna thleng ṭhinte a tihreh theih loh nãin, a ṭul ang zela hmalak a ngaihnaah sorkar a inhawng reng a ni," a ti a; khaw hrang hrangin mamawh an thlente chu a ṭul anga bawhzui a tum thu a hrilh.

TJ Lalnuntluanga hian Village Level Disaster Management Committee leh khawtlang hruaitute a kâwm a, chhawmdawlna thilpek a hlan a ni. Minister ṭawiawmtu Champhai SP Rex Zarzoliana Van­chhawng chuan, "Dungtlang Police Station-ah SDRF (State Disaster Response Force) team member 10 dah a ni. Kar lehah hian khaw hrang hrangte tan chhiatrupna thlen thulha chêt lak dan tur inzirtirna neih tum a ni," a ti a; rîkrum thila hman mai theih tur mamawh zualpui dahna emergency kit sawifiahin, chhungkaw tin chu emergency kit kawl vek turin a chah.