AMC-in bawlhhlawh thliar turin mipui an ngen Aizawlah free wifi an kalpui thar leh dawn
Aizawl Municipal Corporation (AMC) mayor PC Lalhmingthanga chuan, Aizawl khawpuia chengte chu an bawlhhlawh, ṭawih thei leh ṭawih thei lo te, plastic/sarâng lam chi leh electronic waste-te thliar turin a ngen nawn leh a; zawhna chhangin, Aizawlah free wifi a thara kalpui leh tum mek a nih thu a sawi.
AMC hotute chuan nimin khan Aizawl Press Club-ah thuthar thehdarhtute an kâwm a; Mayor chuan zawhna chhangin, free wifi chu Aizawl khawpuia hmun lûn laiahte a thara dah leh tuma hmalak mek a nih thu a sawi a, "A hmaa company-te kha duh anga an rintlak loh avangin free wifi kal mek kha kan titawp. Tunah chuan tute nge rintlak ang tiin kan zir mek a, kan zo thawkhat tawh," a ti.
PC Lalhmingthanga chuan, Tuiriala Solid Waste Management Centre (SWMC) tharah December 12, 2019 aṭangin Aizawla local council (veng) 19-a bawlhhlawhte dah luh a nih thu sawiin, "Tun February 10 aṭang hian veng (LC) dang 38-te bawlhhlawh dah luh ṭan leh tum a ni," a ti a; bawlhhlawh chu a ṭawih theite a tam zawk viau tura an ngaih laiin, ṭawih thei lo a tam zawk hle tih a sawi.
Bawlhhlawh ṭawih thei leh ṭawih thei lo paih ni a hrana siam tur a nih thu leh chu chu local council-te'n an remchan dan angin an siamrem tur thu sawiin Mayor chuan, "Plastic lam chi, sarângte chu Thawhlehniah paih ngei ngei turin kan ngen a, motor-ah pawh sarâng dahna tur bik siam a ni. Electronic waste chu thla khata Thawhlehni hmasa berah paih tur a ni a, hei pawh hi a báwm hran siam a ni," a ti. Chutih rualin, veng lian lo, bawlhhlawh paih tur nei tam lote chu hriatthiamna an neih thu a sawi lang.
Aizawl Mayor chuan, AMC sum hmuhna ber Central Finance Commission Grant aṭanga an sum hmuh hmun thuma ṭhena hmun khat chu Aizawl khawpuia bawlhhlawhte paih nan hman ṭhin a nih thu a sawi a, "Thla tin bawlhhlawh paih nan cheng nuai 48 vel AMC-in a hmang. Aizawlah chhungkaw 67,594 vel awma hriat a ni a, ni tina bawlhhlawh tlingkhawm chu metric ton 159 vel a ni," a ti a; ni tin bawlhhlawh phur lirthei 146 (MMV 88 leh LMV 58) hmangin bawlhhlawh paih ṭhin anga chhût a nih thu a sawi.
PC Lalhmingthanga chuan, Plastic Free City-a Aizawl siam an tumna kawngah kohhran, sikul leh mipuite nen thawhhona ṭha tak an neih thu a sawi a, "Plastic micron 50 aia pan vâiin vawi 74 kan kal chhuak tawh a, kg. 1,000 chuang kan man tawh," a ti a; mipuite chu plastic bag hmang lo turin a ngen.
AMC Mayor chuan Aizawl khawpui tihhmasawn nana AMC hmalakna hrang hrang a sawi lang bawk.
AMC hmalakna kal mek ṭhenkhat
# Tuikual South-ah lirthei 54 dah theihna tur Multi Level Parking cum Market siam mek a ni a, cheng nuai 772.09 hmanga sak niin, September 30, 2020-ah zawh hman tum a ni.
# Bawngkawnah lirthei 38 leh pindan pahnih awmna tur cheng nuai 974.29 sengin multi level parking siam mek a ni a, June 30, 2020-ah zawh hman an tum.
# Cheng nuai 301.03 sêngin Chanmari-Chaltlang inkar kawngpui sirah footpath, metre 360-a thui, ft. 6-a zauin siam mek a ni a, November 14, 2020-a siam zawh an beisei.
# Eco Park & Orchid park cheng nuai 204 sêngin an siam mek a, December 2020-a zawh hman an tum.
# Cheng nuai 1024.22 hmangin Aizawl hmun hrang hrangah footpath siam mek a ni.
# Cheng nuai 101.30 sêngin Aizawl City Park siam a ni.