CM puhna ACB-in an chhui mek ; Lokayukta-in thil chhuitu an la nei lo

Lokayukta-a chief minister Zoramthanga hêk a nihna chu Anti Corruption Bureau (ACB)-in an la chhui mek. Hetih lai hian, Lokayukta-in thil chhuitu tur, Investigation Wing a la nei lo.

Mizoram First Movement (MFM) chuan Lengpui Airport tihchangtlunnaah dan bawh­chhiatna a awm nia ngaiin, a mawhphurtua an ngaih chief minister Zoramthanga chu chhui turin April 11, 2022 khan Lokayukta-ah ngenna an thlen a; Lokayukta chuan bawhzuiin, chhui chiang turin July 2022 khan ACB a hriattir a, ACB mite'n an chhui mek a ni.

Lokayukta hotute hnen aṭanga Vanglaini thu dawn danin, ACB hnena chhui chiang tura an hriattir hmain Lengpui Airport tihchangtlun chungchangah hian GAD leh PWD-ah zawhna an zawt hmasa a, document pawimawhte an dil bawk.

GAD leh PWD aṭanga an dawnte chu Lokayukta chuan an zir chiang a, MFM-in CM Zoramthanga an puhna chu chhui zui tlaka an ngaih avangin chhui chiang turin ACB an hriattir a, GAD leh PWD aṭanga chhànna leh document an dawnte pawh an thil tel a ni.

MFM chuan, PWD enkawl­tu CM Zoramthanga chu a thuneihna hmang sual leh chhungkhat laina duhsak uchuakah an puh a, "India Danpui Article 14 a bawhchhiat avang te, General Financial Rules (GFR) 2017-a rule 162-na leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei turin Lokayukta-ah ngenna kan thlen a ni," an ti.

Hetih lai hian, Lokayukta hian Investigation Wing a la nei lo a, complaint an dawn, chhui chian ngai nia an hriatte chu ACB emaw, CBI emaw an chhuitir thei. CBI chhuitir tur erawh chuan state sorkarin phalna a pek a ngai thung.

Mizoram Lokayukta hian March 11, 2019-a Governor-in chairman a lak luh hnuah a takin hna an thawk ṭan a, an neih ngei ngei tur zingah Investigation Wing a tel a ni.