Youtube hmanga dan bawhchhetute MSCPCR-in koin an vaukhân

Mizoram State Com­mission for Protection of Child Rights (MSCPCR) chuan tun hnaia nau­pang kaihhnawih pawi khawihna thleng chungchang Youtube-a dahtu channel pahnih enkawltute chu nimin khan MSCPCR pisaah koin an zilh a, ti tawh lo turin an vaukhàn.

MSCPCR aṭanga thu dawn danin, MSCPCR hian tun hnaia naupang kaihhnawih pawi khawih­na thlenga naupang kum tling lo hming leh nihna Youtube-a dahtute chu tun hnuah chuan fimkhur tur leh dan bawhchhe lo turin an hriattir a; naupang kaihhnawih dante an hrilhfiah a ni.

Commission chair­man Dr C Lalsangzuala chuan, tun hnaia social media - YouTube, Face­book, WhatsApp leh digital media danga naupang hming, thlalâk leh video-te dan kalha pholan a ni ṭhin chu an ngaimawh thu a sawi a, "Hetiang hi nakin zela naupang an ṭhan len huna khua leh tui ṭha an nih theihna tur kawng dâltu leh mi dangin an chhinchhiah bik theihna tur a ni a, thil pawi tak a nih avangin Juvenile Justice (Care and Protection of Children) Act, 2015 (JJ Act) Section 74 hnuaiah khap tlat a ni," a ti a; dan bawhchhiate hrem an nih theih nan Commission-in hma a la zel tawh dawn tih a sawi.

MSCPCR chuan, JJ Act Section 74 hnuaiah naupang, dan kalha che emaw, venhim ngai emaw, pawikhawihna tuartu emaw, pawikhawihna thlenga thuhretu emawte chu an hming, awmna khua/veng, sikul leh an chanchin dang, an nihna tilang thei tur pholan leh puanzar khap a nih thu an tarlang a, "He dan bawhchhetu chu thla ruk thleng lung-ina tàntir emaw, cheng Rs 2,00,000 thleng pawisa chawitir emaw, a pahnih emawa hrem kawp theih a ni," an ti.