Kângṭhelh páwl kum 50-na lawm a ni

Fire and Emergency Services (FES) chuan nimin khan Hunthar Venga an headquarters-ah an kum 50 tlin, golden jubilee an lawm a, Home minister Lalchamliana'n a hmanpui. Minister chuan, FES thuam chakna turin Ministry of Home Affairs-ah cheng nuai 4,725 hû project thehluh a nih thu a sawi.

FES hi 1972 khan din a ni a, fire station 14-ah thawktu mi 183 an awm mek. District pakuaah fire station dah a ni a, district thar pathumah pawh fire station hawng turin hmalak mek a ni. Vairengte leh Tlabungah fire station a awm tawh bawk.

Lalchamliana chuan, FES chu indaih lo tak chunga ram leh mipui himna tura theihtawp an chhuah ṭhinnaah fakawm a tih thu sawiin, "Kângmei laka mipui kan him theih nan fimkhur inzirtirna an kalpui reng a, kum tin India ram puma hman ṭhin Fire Service Week denchhenin leaflet siamin, kawng hrang hranga hmalak ṭhin a ni," a ti a; Fire Safety & Prevention chungchangah in 79-ah fire safety audit neih a nih tawh thu a sawi.

FES department thuam chak turin MHA-ah project thehluh a nih thu sawiin Lalchamliana chuan, "District hrang hranga fire station sakna tur leh tihchangtlunna tur cheng nuai 4,725 hû thehluh tawh a ni," a ti. Minister hian Fire & Emergency Services 50th Anniversary Souvenir a tlangzarh nghal a ni.

FES-in an chhinchhiah danin, kângmei chhuak kum 2019 khan 192, kum 2020-ah 214, kum 2021-ah 318 leh kumin 2022-ah July thla thlengin 105 a awm tawh a ni.