Poshan Maah hman ṭan a ni

September thla chhunga hman ṭhin Rashtriya Poshan Maah (National Nutrition Month) chu nimin khan hman ṭan a ni a, nimin zing karah khan Social Welfare & Tribal Affairs minister Dr K Beichhua'n Sikulpuikawnah a hawng. District dang­ahte pawh hawnna inkhawm buatsaih a ni.

Poshan Maah hawnna inkhawm hi Women & Child Development department director Lallianpuii'n a kaihruai a; minister K Beichhua chuan, Rashtriya Poshan Maah chu Ministry of Women & Child Development hnuaia mission lian tak, Saksham Anganwadi & Poshan Abhiyaan 2.0 hmalakna zinga pawimawh tak a nih thu a sawi.

Poshan Maah hi September thla chhung zawng hman a ni dawn a, state level, district level, village level leh project angin hman a ni dawn. A tum ber chu - naupangteah ṭhanṭhû, taksa rihna leh san zawng khaikhina zâng lutuk, kum leh rihna khaikhina zâng lutuk leh nausen piang hlim zâng lutuk tihhniam te, nu nau pâi, nau pawm leh tleirawlte'n chaw ṭha an hmuh mumal loh avanga thisen tlâkchhamna laka vente a ni.

WCD director Lallianpuii chuan Poshan Maah hman tawh dan a sawi a; kum dang ang bawka hlâwk taka hman a nih leh theih nan directorate leh anganwadi leh hmun hrang hranga thawkte chu duhsakna a hlàn.

Poshan Maah hawnnaah hian thu­tiam sawi rual a ni a; 'Hriselna, ei leh in ṭha leh faina lam ngai pawimawha theih­tawp chhuah tur leh hemi kawnga mi dangte zirtirtu ni zel turin' an intiam a ni.

Nutrition Month hawnna inkhawm zawhah Poshan Maah Rally neih zui a ni a, WCD department-a thawkte leh JL Higher Secondary School zirlaite'n kawng an zawh a ni.

Rashtriya Poshan Maah hi Lungleiah pawh DC Conference Hall-ah bawrhsap Kulothungan A-in a hawng a; Lunglei ICDS Project leh WCD district programme officer office buatsaihin kawngzawh nghal a ni a, Lunglei BDO Margaret J Vanlalrem-mawii'n a vailiam.

Champhaiah pawh bawrhsap James Lalrin-chhana'n IPR Confe-rence Hall-ah Poshan Maah a hawng a; WCD district programme officer Lalrinmuana'n kaihruaiin, district coordinator Lalmuansanga Hnamte kaihhruaiin thutiam sawi rual a ni.

Champhaiah vêk hian ICDS Project huaihawtin Champhai Zotlanga CDPO pisa tualah Poshan Maah hawnna inkhawm buatsaih a ni a; Champhai CDPO Lalruatmawia Ralte-in kaihruaiin, Champhai BDO Vanlalchhuanliana'n a hawng. Hawnna inkhawm zawhah Poshan Rally buatsaih a ni a, chaw ṭha ei pawimawhna thu tarlanna flag, banner leh poster eng emaw zat an tár a ni.

Poshan Maah chhungin Mizoram chhung hmun hrang hrangah nu leh naupang hriselna lama hmasawn theihna turin inzirtirna leh intihsiaknate buatsaih a ni ang.