Lakhuihthei metric ton 15.7 thawn chhuak

Tuichangral Organic FPC Ltd thar lakhuihthei metric ton 15.7, Sonipat, Haryana leh a chhehvela hralh tur chu nimin khan Agriculture minister C Lalrinsanga'n Ch Saprawnga Truck Terminal, Rangvamual aṭangin a vailiam.

Tuichangral Organic FPC-ah hian Khawzawl district-a khaw pariat - Khawhai, Sialháwk, Tlángmawi, Tlángpui, Chalráng, New Chalráng, Vàngtláng leh Lungtan khuaa lakhuihthei chíngtu mi 500 an tel. Lakhuihthei metric ton 20 thawn chhuah beisei a nih laiin, metric ton 15.7 chiah an la khawm thei rih a ni.

Agriculture Minister chuan, Mizorama thlai tharte chu man man zawka hralhna kawng a inhawn belh zel tih sawiin, "Kut hnathawktute tan a phûrawm sawt a, ṭan lâk lehzual a ngai. Pawn lama mamawh zat kan la thar pha lo hle. Kan thlai tharte hi India ramah duhtu an tam a, min dawrtu tur awm leh awm loh thuah harsatna a awm lo," a ti a; organic lakhuihthei thawn chhuah a ni chu Mizoramin bung thar a kaina a nih thu a sawi.

C Lalrinsanga chuan, agriculture leh a kaihhnawihah service provider-te'n hmangcháng an hre hle tih sawiin, "Anni tan hian hralhna buaipui a harsat loh rualin, kan thlai leh thei tharte tam tham zawka awlsam taka an lak khawm zung zung theih a ngai. India ram hi khawvela consumer market lian ber zinga mi a nih avangin Mizoram state economy ham puarna khawp sum chang thei thlai leh thei hralhna turah harsatna a awm dawn lo," a ti.

MLA Dr ZR Thiamsanga pawhin thu sawiin, Council of Minister meeting hnuhnung berin grep chíngtute tana hlâwkna tura thutlukna a siam chu kut hnathawktute duhsakna a nih thu a sawi.