Mipui ráwn zel turin VC-te chah
Local Administration department (LAD) minister K Lalrinliana chuan Revamped National Panchayat Awards leh Distribution of Materials for Common Service Centre chungchangah nimin khan a pisaah thuthar thehdarhtute a kâwm a; hmalakna leh hna an thawh dan turah mipui vantlang ráwn loa kal mai lo a, mipui ráwn zel turin VC-te a chah.
K Lalrinliana chuan, Ministry of Panchayati Raj-in panchayat/village council thawk ṭhate tan National Panchayat Award a duang tih sawiin, "Award dawng tura VC-te'n hna an thawh rualin, a taka nunpui rengtu nih tum a pawimawh lehzual," a ti a; India rama VC 2,50,000 chuang zingah Mizoram aṭanga lawmman dawng thei VC paruk an awm tawh chu lawmawm a tih thu a sawi.
LAD minister K Lalrinliana chuan, VC-te'n hna an thawh dan turah khawtlang mipui nen sawihona hun (gram sabha) buatsaih fo se a duh thu sawiin, "Gram sabha hi VC-te'n an koh taimâk a ngai a, gram sabha ko loin VC-te hi an kal mai mai tur a ni lo. Gram Sabha hian khawtlang hmasawnna nasa tak a thlen thei a ni," a ti.
K Lalrinliana hian VC 50 hnena pek tur computer leh VC 10 hnena pek tur common service centre (CSC) hmanruate a hlan a; hmanruate chu VC-te'n khawtlang mipui tana an hman tur a nih thu leh anmahni mimal tana pek a nih loh thu a sawi.
LAD joint director Lalchawimawia tarlan danin, Ministry of Pancha-yati Raj chuan kum 2022-23 aṭanga 2025-26 chhung atan Revamped National Panchayat Awards a siam a, National Panchayat Awards kalphung tidanglamin lawmman tihpun a ni dawn.
Revamped National Panchayat Awards hnuaiah hian lawmman - Deen Dayal Upadhyay Panchayat Satat Vikas Puraskar leh Nanaji Deshmukh Sarvottam Panchayat Satat Vikar Puraskar a awm a; lawmman cheng nuai 30-150 inkar dawn theih a ni. Special category - GUSVPP, CNVPP, NDSPSVP, PKNSSP leh best participant (state/district panchayat)-te a awm bawk.
VC thawk ṭha thlang tur hian Ministry of Panchayati Raj chuan www.panchayataward.gov.in a siam a, chutah chuan VC-te'n zawhna chhangin, an hnathawh ṭhatte an thawn a ngai a ni.