Samagra hlawh punna zat tur la hre lo
August 31, 2022-a chief minister Zoramthanga hoa Council of Minister ṭhukhawmin Mizoram Samagra Shiksha hnuaia hlawh tihpun an remtih tawh laiin, thawktute chuan an hlawh punna tur zat an la hre lo.
Vanglaini thu dawn danin, Federation of Mizoram Samagra Employee (FEMSE) hruaitute chuan nimin khan an hlawh punna zat tur hriat tumin Finance department hotute an dâwr a; Finance department hotute chuan Council of Minister meeting minute chhuah hun leh notification chhuah hun nghak rih turin an lo ngen a ni.
Samagra Shiksha hlawh tihpun chungchang zir chiang tura din Study Group chuan Samagra hnuaia thawkte chu Mizoram sorkar hnuaia a ngheta thawk zinga an tlukpuia hlawh hniam ber ang hlawh turin rawtna a siam a ni. Mahse, hei hi Finance department chuan sum dinhmunin a tlin dawn loa an ngaih avangin an pawm thei lo.
Finance department chuan Samagra hnuaia thawkte hlawh punna turah ruahmanna dang an siam a, chu chu August 31, 2022-a Council of Minister ṭhukhawmin an pawm a ni.
Hlawh tur ruahmantu Finance department hnenah hian FEMSE chuan rawtna an thlen a, Finance-in an tihpuitlin leh puitlin loh leh, an hlawh punna zat tur FEMSE hruaitute chuan an hre thei rih lo a ni.