August 2022-ah hripui vei mi 4,378, chhuahtir 4,845, thihpui 12 an awm

Kumin August thla chhung khan Mizoramah Covid-19 vei mi 4,378 hmuh chhuah a ni a, July 2022-a hmuh chhuah 3,694 aiin 684-in a tam zawk. Hripui vei dam tawh mi 4,845 chhuahtir an ni a, hripui vangin mi 12 an thi.

IDSP, Mizoram chhin­chhiah danin, August 2022 chhunga Covid-19 positive hmuh chhuah mi 4,378 chu chawhrualin ni tin mi 141 chuang hret (141.23) an awm ang a ni a, July-ah mi 119 chuang hret awm ang a ni thung.

August thlaa positivity rate chawhrual chu 22.82% a ni a, July thlaa positivity rate 24.18% aiin a hniam hret. Positivity rate hi kumin January-ah 19.75%, February-ah 25.16%, March-ah 15.27%, April-ah 12.74%, May-ah 9.06% leh June-ah 10.87% a ni.

Thla liam ta chhungin swab sample 19,181 endik a ni a, July thlaa endik 15,274 aiin 3,907-in a tam zawk; June thlaah sample 7,086, May-ah 9,747, April-ah 23,010 leh March-ah 64,611 endik a ni.

August 2022 chhunga Covid positive hmuh tam ber ní, ni 1-ah mi 337 hmuh chhuah a ni a; mi 200 aia tam hmuh chhuah ṭum ni sarih a awm. Positive hmuh tlem ber ní, ni 28-ah mi 21 hmuh a ni.

Hripui vei dam tawh August thlaa chhuahtir zat chu mi 4,845 an ni a, positive hmuh zat 4,378 aiin 467-in a tam zawk. August thla chhung vêkin Covid-19 vei zinga mi 12 an thi a; kumin bikah july thlaah mi pasarih, June-ah mi panga, May-ah pahnih, April-ah 11, March-ah 28, February-ah 47 leh January-ah mi 65 an thi a ni.

Kumin 2022-ah January aṭanga August thla thlengin swab sample 4,65,296 endik niin, chu'ng zinga mi 95,513 chu Covid-19 positive an ni a; hripui vei dama chhuahtir mi 96,424 an awm laiin, mi 177 an thi thung.