Chite lui humhalh dan tur sawiho

Save Chite Lui Execu-tive Committee chu an chairman Dr Renu Sharma, chief secretary hoin nimin khan CS conference hall-ah an ṭhukhawm a; Bawngkawn leh Durtlang inkar khàma ramngaw chereu chhan zir chiang tur leh a ṭul anga rawtna siam turin Environment, Forests & Climate Change department an ruat.

Ṭhutkhawmah hian Chite lui humhalh leh humhimna tura hmalakna kalpui mek te, a chhehvel tuai thara tihmawina tura ruahmanna hrang hrang kalpui dan turte sawiho a ni a; Save Chite Lui Comprehensive Action Plan siam turin North Eastern Regional Institute of Water and Land Management (NERIWALM), Tezpur an pawm. NERIWALM hi September thlaah Aizawlah an rawn kal ang.

September thla chhungin Chite lui chhehvela ram neitute intawh khawmna buatsaih te, October leh November thlaah Chite luia bawlhhlawh leh thli luan luh theihna veng hrang hrang local council, YMA, MHIP leh MUP-te nen intawh khawm leh, chu'ng veng hrang hrang kohhran hruaitute nena inkawmhona buatsaihte an rél bawk.

Chite lui humhalhna atana NEDP aṭanga sum hmuh leh hmalakna hrang hrangte thlirho a ni a; AMC-in khawpui thli leh hnawmhnawk danna tura hma a lak mek chu lawmawm a tih thu an sawi bakah, Chite lui humhimna tur project pawh chawlhkar hnih chhunga buatsaih turin AMC an ngen a ni.