Covid-19 vanga thi mi pahnih awm belh

August 31, Nilaini khan Mizoramah Covid-19 vei mi 93 hmuh chhuah a ni, nimin khan hripui vei dam tawh mi 75 chhuahtir an ni. Covid-19 vanga thi mi pahnih an awm belh. Nimin tlai khan hripui vei enkawl lai mi 476 an awm.

Nilainia Covid-19 positive hmuh thar mi 93-te chu mipa 49 leh hmeichhia 44 an ni a, rapid antigen test hmanga hmuh chhuah vek an ni. Swab sample endik zat 535 aṭanga positivity rate chu 17.38% a tling.

August 31, Nilaini khan hripui vei enkawl lai thi mi pahnih an awm. MC Lalrinthanga (67), Khatla South chu zing dar 8-ah State Referral Hospital-ah a thi a; Covid-19 positive a ni tih August 1, 2022 khan hmuh chhuah a ni a, natna dang nei tel a ni.

Covid-19 vei Ebenezer Medical Centre-a enkawl lai Sangsiama (76), Zarkawt pawh Nilaini tlai dar 4:30 khan a thi. Hripui vei a ni tih August 21 khan hmuh chhuah a ni a, natna dang nei tel a ni tih sorkar thuchhuakin a tarlang.

IDSP record angin, Mizoramah Covid-19 vei 2,37,178 hmuh chhuah a ni tawh a, mipa 1,10,463 leh hmeichhia 1,26,714 an ni a, mipa aiin hmeichhia 16,252-in an tam zawk. Nimin tlai dar 5 thleng khan mi 2,35,980 (99.49%) chhuahtir an ni tawh a, mi 722 (0.30%) thi tawhin, enkawl mek mi 476 (0.21%) an awm.

Kum 2011 chhiarpui angin, Covid-19 vei hmuh tawh 2,37,178 chu state mipui zat aṭangin 21.62% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.